काठमाडौँ । नेपाली फुटबल लिग (एनएफएल) फागुन १ गतेदेखि हुने भएको छ । पहिलो संस्करणमा घरेलु फुटबलका पुराना ७ क्लबसहित थप गरिने नयाँ टिमले प्रतिस्पर्धा गर्नेछन् ।

काठमाडौँ रेजर्स फुटबल क्लब, ललितपुर सिटी फुटबल क्लब, एफसी चितवन, पोखरा थन्डर्स, बुटवल लुम्बिनी फुटबल क्लब, धनगढी एफसी र झापा एफसी घरेलु फुटबलका पुरानै क्लब हुन् ।

रङ्गशालाको उपलब्धताअनुरूप एनएफएलमा होम एन्ड अवेको आधारमा खेल सञ्चालन गरिनेछ । तयारी अवधिसहित हिसाब गरी एनएफएल ४ महिना चल्नेछ । यसले देशव्यापी रुपमा फुटबलको माहोल सिर्जना गर्ने आयोजक एनएफएलले जनाएको छ ।

प्रतियोगिता निष्पक्ष ढङ्गले सञ्चालन गर्नको लागि बेग्लै इन्डिपेन्डेन्ट कमिटी बनाइने एनएफएलका चेयरम्यान कल्याण गुरुङले बताए ।