काठमाडौँ । नेप्लिज तेक्वान्दो एकेडेमी (एनटिए) ले बाढीपीडित तेक्वान्दोका साग पदक विजेता रेजिन रिमाललाई आर्थिक सहयोग प्रदान गरेको छ ।
२०८३ असोज ३० गते शुक्रवार कागेश्वरी मनोहरा नगरपालिकाको डाँछीस्थित एनटीएको हलमा आयोजित एक कार्यक्रममाझ सो सहयोग प्रदान गरिएको हो ।
राष्ट्रिय खेलकुद परिषद् कार्यकारी समितिकी पूर्व सदस्य नन्दा बस्याल, नेपाल तेक्वान्दो सङ्घ बागमती प्रदेशका अध्यक्ष केशव पुरी र काठमाडौँ जिल्ला तेक्वान्दो सङ्घका अध्यक्ष विक्रम खड्गीले रेजिनलाई दुई लाख एक हजार रुपैयाँ हस्तान्तरण गर्नुभएको हो ।
एनटिएका अध्यक्ष तेक्वान्दोका अन्तर्राष्ट्रिय निर्णायक अशोक खड्काले रेजिनलाई सहयोग गर्न पहल गरेका थिए । अध्यक्ष खड्काले तेक्वान्दोकर्मी, शुभचिन्तकलगायतबाट सहयोग सङ्कलन भएको जानकारी दिए ।
सिन फुले ४० हजार, जेम्सले सात हजार, सोलेहिन, नन्दा बस्याल, अन्जन कुइकेल र डा. रमेश ढकालले समान १०–१० हजार, अमरचन्द्र बोहराले पाँच हजार एक सय, मनोज थापाले दुई हजार पाँच सय, सहदेव थापाले तीन हजार, कृषन चौधरीले १५ हजार, राजकुमार थापाले दुई हजार दुई सय २२, सुवासचन्द्र गौतमले तीन हजार एक सय, श्याम थापाले दुई हजार तथा प्याट्रिक, पेशल राई, घनश्याम कार्की, मुकुन्द गजुरेल, भीम तुम्बापो, युमा र गङ्गाराम बस्नेतले समान पाँच/पाँच हजार रुपियाँ सहयोग उपलब्ध गराएको अध्यक्ष खड्काले बताए ।
सङ्कलित सहयोगमा अपुग रकम अध्यक्ष खड्का र गणेशबहादुर खड्काले थपेर रेजिनलाई दुई लाख एक हजार सहयोग प्रदान गरिएको थियो ।
गत भदौ १० गते भोटेकोशी–त्रिशूली नदीमा आएको बाढीले रेजिनको नुवाकोट जिल्लाको विदुर नगरपालिका–७ स्थित त्रिशूलीमा रहेको नयाँ र पुरानो गरी दुइटा घर बगाएको थियो । नयाँ घर बनाउन बैङ्क र विभिन्न संस्थाबाट करिब ४५ लाख ऋण लिएको रेजिनले बताए ।
अध्यक्ष खड्का खेल क्षेत्रसँगै सामाजिक सेवामा निरन्तर सक्रिय छन् । २०७२ सालको विनाशकारी भूकम्प, कोभिड महामारी, आर्थिक कारणले समस्यामा परेकालाई विभिन्न समयमा अशोकले सक्दो सहयोग गर्दै आएका छन् ।
अध्यक्ष खड्काले सहयोगी सबैलाई धन्यवाद दिदै मर्कामा परेका खेलाडीलाई आफ्नोतर्फबाट सानो प्रयास भएको बताए ।
