भीमदत्तनगर । कञ्चनपुरको भीमदत्त नगरपालिका–१ का वडाध्यक्ष आशिफ कुँवर (भुन्टु) ले नौ वर्षदेखि आफूले पाउँदै आएको तलबभत्ताबापतको रकम वडाका जेष्ठ नागरिक र अपाङ्गता भएका व्यक्तिलाई वितरण गर्दै आएका छन् ।
पहिलोपटक २०७४ सालमा वडाध्यक्षमा निर्वाचित भएपछि कुँवरले राज्यबाट प्राप्त हुने तलबभत्ता तथा सेवासुविधा नलिने घोषणा गरेका थिए ।
त्यसयता उनले आफूले पाउँदै आएको रकम वडाका ज्येष्ठ नागरिक र अपाङ्गता भएका व्यक्तिलाई वितरण गर्दै आएका छन् । २०७९ सालको निर्वाचनमा दोस्रो कार्यकालका लागि वडाध्यक्षमा निर्वाचित हुनुभएका कुँवरले जनप्रतिनिधिका रूपमा प्राप्त हुने सबै सुविधा वितरण गर्दै आए ।
वर्षभरिको तलबभत्ता जम्मा गरेर दशैँका बेला वितरण गर्ने उहाँले असोज २५ गते घटस्थापनाको अवसर पारेर वडाका एक सय ५८ जना ज्येष्ठ नागरिक र सात जना अपाङ्गता भएका व्यक्तिलाई जनही रु एक हजार पाँच सयका दरले वितरण गरे ।
‘हामी बुढापाकाले दशैँको बेला सहयोग प्राप्त गर्दा असाध्यै खुसी छाँै’ स्थानीय लीला लामिछानेले भने– ‘अध्यक्षले हरेक वर्ष दशैँमा यसरी नै सहयोग गर्दै आउनुभएको छ ।”
स्थानीय तहमा जनप्रतिनिधिले पाउने सेवा सुविधाका बारे विभिन्न बहस भइरहेका बेला कुँवरको यो अभ्यासको स्थानीयले प्रशंसा गरेका छन् । स्थानीय तुलसी बोहराले भने– “ठुलो पदमा पुगे अझै हाम्रो वडाका काम गर्नुहुथ्यो ।’
ज्येष्ठ नागरिक तथा अपाङ्गता भएका व्यक्तिलाई वितरण गरिएको रकमले चाडपर्वका बेला आवश्यक सामग्री खरिद गर्न केही सहयोग पुग्ने उहाँले बताए ।
वडाअध्यक्ष कुवँरले राज्य सङ्कटमा रहेका बेला जनप्रतिनिधिले सेवा सुविधा लिनु उचित नहुने बताए ।
‘जनप्रतिनिधि जनताका सेवक हुन्, जनप्रतिनिधिले राज्यको सेवासुविधा लिनुभन्दा पनि जनताका लागि सेवा गर्ने हो’ अध्यक्ष कुवँरले भने– ‘२०७४ सालमा पहिलोपटक निर्वाचित हुँदादेखि नै मैले एक वर्षको पारिश्रमिक जम्मा गरेर चाडपर्वका बेला वडाका ज्येष्ठ नागरिक र असहायलाई वितरण गर्दै आएको छु ।’ (रासस)
