काठमाडौँ । राष्ट्रिय परीक्षा बोर्डले माध्यमिक शिक्षा परीक्षा एसईईको परीक्षाफल प्रकाशित गरेको छ । सोमबार बसेको बोर्डको बैठकले एसइई परीक्षाफल प्रमाणीकरण गरेपछि प्रकाशित भएको हो ।
बोर्डका अनुसार ४ लाख ७२ हजार ७८ जनाको परीक्षाफल प्रकाशित गरिएको हो । यस पटक बोर्डले बनाएको मापदण्डका आधारमा सम्बन्धित विद्यालयले नै विद्यार्थीलाई अङ्क प्रदान गरेका छन् । सोही मूल्याङ्कनलाई राष्ट्रिय परीक्षा बोर्डले प्रमाणित गरेर नतिजा प्रकाशित गरेको छ।
सम्बन्धित विद्यालयका प्रधानाध्यापकको अध्यक्षताको ३ सदस्यीय मूल्याङ्कन समितिले आन्तरिक मूल्याङ्कनका आधारमा कक्षा १० का विद्यार्थीको नतिजा तयार गरेको थियो । विद्यालयले पठाएको सोही नतिजालाई राष्ट्रिय परीक्षा बोर्डले प्रमाणित गरेको हो ।
मूल्याङ्कनका लागि राष्ट्रिय परीक्षा बोर्डले मापदण्ड तय गरेको थियो । विद्यालयका प्रधानाध्यापकसहित सम्बन्धित कक्षा शिक्षक र नियुक्तिका आधारमा वरिष्ठ शिक्षक रहने गरी मूल्याङ्कन समिति गठन गरेर नतिजा तयार गरिएको थियो ।
