काठमाडौँ । नेपाल वाङ्मय परिषद्, धनगढी कैलालीको आयोजनामा संस्थाका कार्यसमिति सदस्य लक्ष्मीप्रसाद पौडेलको लघुकथा कृति ‘प्रश्नोत्तर’ विमोचन गरिएको छ ।
संस्थाको अध्यक्ष डा. पुष्करराज भट्टको अध्यक्षता तथा प्रमुख अतिथि वरिष्ठ साहित्यकार ध्रुव मधिकर्मीको उपस्थितिमा २०८३ भदौ ७ गते काठमाडौँको ग्रीनलिफ रेस्टुरेन्टमा सो कार्यक्रम सम्पन्न भएको हो ।
विचोचन समारोहमा विशिष्ट अतिथिका रूपमा नेपाली लघुकथामा विद्यावारिधि गर्नुभएका डा. हरिप्रसाद भण्डारी एवम् हाम्रो लघुकथा केन्द्रकी संस्थापक अध्यक्ष लता केसी उपस्थित हुनुहुन्थ्यो ।
त्यस्तै अतिथिमा डा. अमर शाह र मधुपर्कका सम्पादक दीपक श्रेष्ठको पनि सहभागिता रहेको थियो ।
विमोचन समारोहमा डा. शेखरकुमार श्रेष्ठ एवम् शेखर अर्यालले कृतिका विविध पक्षमाथि प्रकाश पार्नुभएको थियो ।
समारोहमा साझा प्रकाशनका सञ्चालक सदस्य मनोहर लामिछाने, वरिष्ठ लघुकथाकार हरि थापा, वरिष्ठ साहित्यकार डा. नवराज रिजाल, दीपक लोहनी एवम् कृतिका प्रकाशक भुँडीपुराण प्रकाशनका केशव पराजुलीले शुभकामना व्यक्त गर्नुभएको थियो ।
कृतिकार पौडेलले कृतिको लेखनगत सन्दर्भ एवम् आफ्ना सिर्जनात्मक अभिव्यक्ति दिनुभएको थियो ।
कार्यक्रममा महेन्द्र न्यौपाने, ध्रुवराज थापा, प्रार्थना खनाल, शान्ता तिमिल्सिनाले विमोचित कृतिबाट लघुकथा वाचन गर्नुभएको थियो ।
वन्दना घिमिरेको सञ्चालनमा सम्पन्न कार्यक्रममा प्रमुख अतिथि मधिकर्मी तथा विशिष्ट अतिथिद्वय डा. भण्डारी र केसीले आआफ्ना विचार राख्नुभएको थियो ।
कार्यक्रममा लेखक पौडेलका पारिवारिक सदस्यका साथै ५० जना साहित्यकारको उपस्थिति थियो ।
