काठमाडौँ । टेलिभिजन रियालिटी शो ‘द भ्वाइस किड्स’ सिजन–५ को उपाधि सुवासना खड्काले जितेकी छन्।

शनिबार आयोजित ग्रान्ड फिनालेमा टिम वाङ्देन शेर्पाबाट प्रतिस्पर्धा गरेकी खड्का विजेता घोषित भएकी हुन्। उपाधिसँगै उनले १० लाख रुपैयाँ पुरस्कार प्राप्त गरेकी छन्।

शोमा पहिलोपटक कोच बनेका वाङ्देन शेर्पाले उपाधि जितेपछि आफूलाई सपनाजस्तो महसुस भएको बताए।

फिनालेमा सुवासनासहित आठ जना प्रतियोगीले उपाधिका लागि प्रतिस्पर्धा गरेका थिए। टिम वाङ्देन शेर्पाबाट सुवासना खड्का र क्रिएसन रोका, टिम अर्जुन सापकोटाबाट आन्भी विष्ट र आर्मन कार्की, टिम मिलन नेवारबाट प्राञ्जल ढुंगेल र रुइसाङ पाख्रिन तथा टिम सत्यराज आचार्यबाट कविना राई र सम्राट खनालले फिनालेमा प्रतिस्पर्धा गरेका थिए।

कार्यक्रममा चाँडै ‘द भ्वाइस अफ नेपाल’को आठौँ सिजनसमेत प्रसारण हुने जानकारी गराइएको छ।