काठमाडौं, साउन २७ । जापानमा आगामी असोज ३ गतेदेखि हुने २०औँ एशियाली खेलकुदमा नेपाली ई–स्पोर्ट्स खेलाडी सहभागी हुन नपाएको विषयमा राष्ट्रिय खेलकुद परिषद् (राखेप) ले आफ्नो धारणा सार्वजनिक गरेको छ।

राखेपका अनुसार नेपाल ओलम्पिक कमिटीमार्फत पठाइएको प्रारम्भिक नामावलीमा परिषद्मा दर्ता रहेको ई–स्पोर्ट्स संघ, नेपालको समन्वयमा खेलाडीको नाम समावेश गरिएको थियो। पछि ई–स्पोर्ट्स गतिविधिमा संलग्न अर्को संस्था नेपाल ई–स्पोर्ट्स संघबारे जानकारी पाएपछि परिषद्ले आवश्यक समन्वयका लागि पत्राचार गरे पनि तोकिएको समयभित्र उक्त संस्था सम्पर्कमा नआएको राखेपको दाबी छ।

आयोजकले तोकेको समयसीमाभित्र अन्तिम नामावली पठाउनुपर्ने भएकाले सम्बन्धित संघको सिफारिसमा १२ खेलाडीसहित १५ सदस्यीय टोलीको सहभागिताका लागि सिफारिस गरिएको राखेपले जनाएको छ। तर, परिषद्मा दर्ता रहेको ई–स्पोर्ट्स संघ, नेपालले आफ्ना सिफारिस गरिएका खेलाडी छनोट नभएको जनाउँदै प्रतियोगितामा ई–स्पोर्ट्सको सहभागिता नहुने पत्र पठाएपछि सहभागिता रद्द गरिएको राखेपको भनाइ छ।

समयसीमा सकिएपछि नेपाल ई–स्पोर्ट्स संघले आफ्ना खेलाडी छनोट भएको दाबी गर्दै सहभागिताको माग गरेको भए पनि प्रारम्भिक नामावलीमै समावेश नभएका खेलाडीलाई अन्तिम चरणमा सहभागी गराउन नसकिने राखेपले स्पष्ट पारेको छ।

राखेपले समयमै समन्वय नगर्ने र समयसीमा सकिएपछि मात्र सहभागिताको दाबी गर्ने प्रवृत्तिका कारण समस्या उत्पन्न भएको जनाएको छ। साथै, ई–स्पोर्ट्स खेलाडी सहभागी हुन नसकेको विषय प्रक्रिया, सम्बन्धित संघको सिफारिस र तोकिएको समयसीमासँग प्रत्यक्ष रूपमा जोडिएको स्पष्ट गर्दै एकपक्षीय रूपमा सार्वजनिक भएका समाचारप्रति असहमति जनाएको छ।