“मूल प्रवाहको पहलमा कम्पनीले आर्थिक सहयोग र रोजगारीको आश्वासन”

Advertisement

रेवाडी (भारत) । हरियाणा राज्यको रेवाडीमा रेलको ठक्करबाट ज्यान गुमाएका चितवनको माडी नगरपालिका–२, भैरापुर निवासी ३२ वर्षीय प्रकाश बिकको मूल प्रवाह अखिल भारत नेपाली एकता समाजको पहलमा रेवाडीमै दाहसंस्कार गरिएको छ । घटनापछि संस्थाले प्रहरी, कम्पनी र मृतकका आफन्तबीच समन्वय गर्दै पोस्टमार्टमदेखि अन्त्येष्टिसम्मको सम्पूर्ण प्रक्रिया सम्पन्न गराएको हो ।

प्रकाश बिकको गत २४ जुलाई २०२६ को राति ड्युटी सकेर डेरातर्फ फर्कने क्रममा रेल्वे लिक पार गर्दा तीव्र गतिमा आइरहेको रेलको ठक्करबाट घटनास्थलमै मृत्यु भएको थियो । उनी चार महिनाअघि रोजगारीका लागि भारत आएका थिए र रेवाडी जिल्लाको बावल कस्बास्थित दुर्गा ट्रान्सपोर्ट कर्पोरेसनमा चालकका रूपमा कार्यरत थिए । घटनाको राति पनि उनले आफूले चलाएको सवारीसाधन कम्पनीमा पार्किङ गरी फर्कने क्रममा दुर्घटनामा परेका थिए ।

दुर्घटना अत्यन्तै भीषण भएकाले उनको शरीरका विभिन्न अङ्गहरू छरिएका थिए भने टाउको र हात गम्भीर रूपमा क्षतविक्षत भएका थिए । शरीरको एउटा भाग करिब ५० मिटर टाढासम्म पुगेको प्रहरीले जनाएको छ ।

भोलिपल्ट बिहान एक यात्रीले रेल्वे प्रहरी (जीआरपी)लाई जानकारी दिएपछि प्रहरी घटनास्थलमा पुगेर शव संकलन गरी रेवाडीस्थित शवगृहमा लगेको थियो । मृतकले लगाएको ड्युटीको पोसाकका आधारमा उनको पहिचान भएको थियो । त्यसपछि प्रहरीमार्फत आफन्तलाई खबर गरिएको थियो ।

संजय बिकमार्फत घटनाबारे जानकारी पाएपछि मूल प्रवाह अखिल भारत नेपाली एकता समाजको रेवाडी नगर समितिका प्रतिनिधिहरू अस्पताल पुगेका थिए । उनीहरूले प्रहरी, कम्पनीका सञ्चालक र मृतकका आफन्तसँग समन्वय गरी आवश्यक कानुनी प्रक्रिया अघि बढाएका थिए ।

मूल प्रवाहका केन्द्रीय सदस्य ज्ञानप्रसाद शर्मा र रेवाडी नगर समिति अध्यक्ष रामबहादुर खड्काको पहलमा कम्पनीसँग छलफल गरी मृतकका परिवारलाई आर्थिक सहयोग उपलब्ध गराउने र अन्त्येष्टिको सम्पूर्ण व्यवस्था मिलाइएको थियो । त्यसपछि २५ जुलाईमा पोस्टमार्टम सम्पन्न गरी रेवाडीमै दाहसंस्कार गरिएको थियो ।

दाहसंस्कारमा मृतकका आफन्त दीपक बिक, संजय बिक, मनप्रसाद बिक, शालु र सुमित्रासहित मूल प्रवाहका क्षेत्रीय सल्लाहकार प्रेम अधिकारी, नगर समिति उपाध्यक्ष देवेन्द्र केसी, कोषाध्यक्ष जोगबहादुर आले, रूपेश रोका, लक्ष्मण श्रेष्ठ, सोम तिवारीलगायत अन्य सदस्यहरूको उपस्थिति रहेको थियो ।

कम्पनीसँग भएको छलफलपछि मृतकका दुई जना आफन्तलाई नेपाल फर्कन यातायात खर्च तथा बाटो खर्च उपलब्ध गराउने सहमति भएको छ । साथै कम्पनीका सञ्चालकले मृतकका एक जना आफन्तलाई रोजगारी उपलब्ध गराउने आश्वासन दिएको मूल प्रवाहका केन्द्रीय सदस्य तथा पत्रकार ज्ञानप्रसाद शर्माले जानकारी दिएका छन् ।

भारतका विभिन्न क्षेत्रमा रोजगारीका लागि गएका नेपाली श्रमिकहरू रेल तथा सडक दुर्घटनामा परेर ज्यान गुमाउने घटना समय–समयमा दोहोरिने गरेका छन् । यस्ता दुःखद घटनामा मूल प्रवाह अखिल भारत नेपाली एकता समाजले कानुनी प्रक्रिया, शव व्यवस्थापन, अन्त्येष्टि तथा पीडित परिवारलाई आवश्यक समन्वय र सहयोग गर्दै आएको छ ।