काठमाडौँ । ‘स्रष्टाका आँखामा प्युठान’ संस्मरणमूलक कृति विमोचनसँगै प्रगतिवादी साहित्यकार मोहनविक्रम सिंहलाई सम्मान गरिएको छ ।
२०८३ साउन १६ गते शनिबार बागबजारमा आयोजित एक औपचारिक कार्यक्रममाझ सो कार्यक्रम सम्पन्न भएको हो ।
प्रमुख अतिथिसमेत रहनुभएको साहित्यकार सिंहलाई विशिष्ट अतिथि स्रष्टा पदयात्रा नेपालका अध्यक्ष शीतल गिरीले सम्मानित गर्नुभएपछि सम्मानित प्रतिभा सिंहले सङ्क्षिप्त मन्तव्य राख्नुभएको थियो ।
कार्यक्रमको अध्यक्षता ओखरकोट पर्यटन तथा ग्रामीण विकास सेवा समिति प्युठानकी संस्थापक अध्यक्ष दुर्गा पौडेलले गर्नुभएको थियो ।
पदयात्राकै महासचिव गङ्गाप्रसाद भेटवालको सञ्चालनमा अघि बढेको उक्त कार्यक्रममा उपस्थित सहभागीलाई प्रतीक घिमिरेले स्वागत गर्नुभएको थियो ।
कार्यक्रममा राष्ट्रिय जनमोर्चाका कावा अध्यक्ष रश्मिराज नेपाली, लुम्बिनी प्रदेशका सांसद तारा थापा, अभिनव साहित्य समाजका अध्यक्ष गोविन्द घिमिरे, साहित्यकारहरू हुकुमबहादुर जिसी र माधव श्रेष्ठको पनि आतिथ्य रहेको थियो ।
कार्यक्रममा पुस्तकको विमोचन अतिथिहरूले संयुक्त रूपमा गर्नुभएको थियो ।
प्रस्तुत कृतिमाथि सोही पुस्तकका सम्पादक डा. बालचन्द मिश्रले चर्चा गर्नुभएको थियो भने सम्मानित प्रतिभा सिंहको बारेमा वासुदेव पोखरेलले चर्चा गर्नुभएको थियो ।
पदयात्राका उपाध्यक्ष विमल अर्यालले धन्यवाद ज्ञापन गर्नुभएको उक्त कार्यक्रममा शान्ति सापकोटाले कविता वाचन गर्नुभएको थियो ।
उता, प्युठानमा आजै बिहान उपर्युक्त कृतिको विमोचन भइसकेको छ ।
स्रष्टा पदयात्राले २०८२ जेठ महिनामा सम्पन्न गरेको चौरानब्बेऔँ पदयात्रामा सहभागी २८ मध्ये २७ जनाको संस्मरणमूलक कृतिलाई ओखरकोट पर्यटन समितिले प्रकाशन गरेको हो ।
