काठमाडौँ । प्युठानका बारेमा साहित्यकारद्वारा लेखिएका सामग्री समेटिएको पुस्तक ‘स्रस्टाका आँखामा प्युठान’ विमोचन हुने भएको छ ।
२०८३ साउन १६ गते शनिबार दिउसो १२ बजे बागबजारस्थित हार्दिक होटलमा सो कार्यक्रम हुन थालेको हो ।
पुस्तकको विमोचन स्रष्टा पदयात्रा नेपालका अध्यक्ष शीतल गिरीले गर्नुहुने पुस्तकको प्रकाशक ओखरकोट पर्यटन एवम् ग्रामीण विकास सेवा समितिले जानकारी दिएको छ ।
कार्यक्रमको आयोजकसमेत रहेको सेवा समितिका अनुसार सो कार्यक्रममा प्रगतिवादी साहित्यकार मोहनविक्रम सिंहलगायत प्युठान तथा अन्य साहित्यकारको पनि उपस्थिति रहनेछ ।
सेवा समितिकी संस्थापक अध्यक्ष दुर्गा पौडेलको अध्यक्षतामा स्र्रष्टा पदयात्राका सचिव गङ्गाप्रसाद भेटवालले सञ्चालन गर्नुहुने उक्त कार्यक्रममा उपस्थित सहभागीलाई सोही संस्थाका अर्का पूर्व अध्यक्ष सुवास जिसीले स्वागत गर्नुहुने कार्यक्रम रहेको छ ।
कार्यक्रममा स्रष्टा पदयात्राका उपाध्यक्ष विमल अर्यालले धन्यवाद ज्ञापन गर्नुहुने कार्यक्रम रहेको आयोजकले जनाएको छ ।
उता, प्युठानको बागदुलामा पनि सो पुस्तकको विमोचन हुँदैछ । शनिबार नै बिहान ८ बजे सम्पन्न हुने उक्त कार्यक्रममा पुस्तकको विमोचन सेवा समितिका बहालवाला अध्यक्ष तिलक जिसीले गर्नुहुने बताइएको छ ।
