नवीन बस्याल
टोकियो (जापान) । रक्तिम सांस्कृतिक अभियानका संस्थापक अध्यक्ष तथा जनगायक जीवन शर्माको बहुप्रतीक्षित एकल साँझ जापानको टोकियोस्थित मेगुरो कुमिन सेन्टरमा सम्पन्न भएको छ।
जनगायक शर्माले आफ्ना सिर्जनाहरू प्रस्तुत गर्दा हलभरि उपस्थित दर्शक भावविभोर बनेका थिए । उनका गीतसँगै दर्शकहरू गुनगुनाउँदै र नाच्दै रमाएका थिए।
कार्यक्रममा उनले प्रस्तुत गरेका चर्चित गीतहरू ‘मधेसी, पहाडी, हिमालका हिमाली’, ‘फोकल्याण्डको टापूबाट’, ‘म डुल्दै जाँदा तराईको फाँटमा’, ‘तलमा पर्यो बेँसीको फाँट, माथि पर्यो कैलाश’, ‘चाहिँदैन मलाई सिसाको महल’, ‘झर्नाको चिसो पानी’, ‘म हिँडेको गाउँको बाटो मुस्कुराओ’, ‘सधैँ उच्च छ शिर, हेर्दा हँसिलो मुहार’, ‘सिमली छायाँमा बसी’ तथा अन्तिम प्रस्तुति ‘यसपाली त यस्तै भो आमा’ ले विशेष रूपमा दर्शकको मन जित्न सफल भए ।
जीवन शर्माका गीतहरूमा रक्तिम सांस्कृतिक अभियान जापानका कलाकारहरूले आकर्षक नृत्य प्रस्तुत गरेका थिए ।
आयोजकका अनुसार कार्यक्रम सम्पन्न गराउन बसन्त थापाको विशेष पहल तथा एनआरएनए जापानको समन्वयात्मक भूमिका रहेको थियो।
कार्यक्रममा जापान नेपाली एकता समाजका नेता–कार्यकर्ता, विभिन्न सामाजिक तथा सांस्कृतिक संघ–संस्थाका प्रतिनिधि तथा ठूलो सङ्ख्यामा जापानस्थित नेपाली समुदायको सहभागिता रहेको थियो ।
