धनगढी । बिहीबारदेखि सुरु भएको डा. गोविन्द केसीको अनसन विरुद्ध सहिद दशरथ चन्द स्वास्थ्यविज्ञान विश्वविद्यालय सङ्घर्ष समितिले प्रतिअिनशन बस्ने चेतावनी दिएको छ ।
समितिका संयोजक लोकराज पाण्डेले शुक्रबार भिडिओ सन्देश जारी गर्दै सहीद दशरथ चन्द स्वास्थ्यविज्ञान विश्वविद्यालय सुदूरपश्चिमबासीको लामो सङ्घर्ष, त्याग र बलिदानबाट प्राप्त उपलब्धि भएकाले यसको विरोध कुनै पनि हालतमा स्वीकार्य नहुने दाबी गरेका हुन् ।
उनले डा केसीले सुरु गरेको अनशन तत्काल फिर्ता लिन आग्रह गरे । फिर्ता नलिए सरकार र डा. केसी विरुद्ध नै प्रतिअनशन सुरु गर्न बाध्य हुने चेतावनीसमेत दिए ।
विश्वविद्यालय सुदूरपश्चिमका नागरिकको अधिकार, भावना र आकाङ्क्षासँग जोडिएको विषय भएकाले यसको स्थापना तथा सञ्चालन प्रक्रियालाई कमजोर बनाउने कुनै पनि गतिविधि स्वीकार्य नहुने उनको दाबी छ ।
उनले विश्वविद्यालय सञ्चालनको प्रक्रिया अवरुद्ध पार्ने प्रयास नगर्न पनि डा. केसीलाई आग्रह गरेका छन् ।
हिजोदेखि डा. केसीले धनगढीमा चौबिसौँ सत्याग्रह जारी राखेका छन् । चिकित्सा शिक्षा सुधारका मागसँगै उनले सहिद दशरथ चन्द विश्वविद्यालयसम्बन्धी विषयलाई पनि आन्दोलनको प्रमुख एजेन्डा बनाएका छन् ।
डा. केसीले गेटामा विश्वविद्यालय स्थापना गर्ने प्रक्रिया पारदर्शी र विधिसम्मत नभएको तथा हतारमा निजी स्वार्थ समूहलाई फाइदा पुग्ने गरी कानुन ल्याइएको आरोप लगाउँदै आएका छन्, यद्यपि सङ्घर्ष समितिले भने उक्त विश्वविद्यालय सुदूरपश्चिमबासीको ऐतिहासिक उपलब्धि भएकाले त्यसको विरोध अस्वीकार्य रहेको बताएको छ ।
