काठमाडौँ । डा. गोविन्द केसीले चौबिसौँ सत्याग्रह (अनशन) कैलालीको सदरमुकाम धनगढीमा सुरु गरेका छन् ।

चिकित्सा शिक्षा र स्वास्थ्य क्षेत्रमा सुधारको माग गर्दै लामो समयदेखि सङ्घर्षरत डा. केसी २०८३ साउन ८ गतेदेखि पुन: अनशन सुरु गरेका हुन् ।

डा. केसीले यसपटकको अनशन मुख्य गरी गेटा मेडिकल कलेजलाई विश्वविद्यालय बनाउने प्रक्रियामा भएका राजनीतिक नियुक्ति र निजी स्वार्थ समूहको चलखेलका विरुद्ध केन्द्रित गरेका छन् ।

उनले आफू गेटा मेडिकल कलेज वा विश्वविद्यालयको विरोधी नभएको प्रस्ट पार्दै त्यहाँ हुने नियुक्तिमाथि प्रश्न उठाए ।

डा. केसीले सार्वजनिक संस्थामा निजी मेडिकल कलेजसँग आबद्ध र स्वार्थ बाझिने व्यक्तिलाई पदाधिकारी नियुक्त गरिनुले गेटाको भविष्य र चिकित्सा शिक्षाको गुणस्तरमा गम्भीर असर पर्ने दाबी गरे । उनले त्यस्ता स्वार्थ बाझिने पदाधिकारीको नियुक्ति तत्काल खारेज गर्नुपर्ने माग राखेका छन् ।

त्यस्तै उनले चिकित्सा शिक्षा आयोगको गरिमा जोगाउनुपर्ने र आयोगले निर्धारण गरेका मापदण्ड विपरीत निजी कलेजमा सिट सङ्ख्या बढाउने वा छात्रवृत्ति कटौती गर्नेजस्ता कार्य तत्काल रोक्न माग गरेका छन् ।

उनले राष्ट्रिय चिकित्सा शिक्षा ऐन–२०७५ को मर्मअनुसार चिकित्सा शिक्षालाई पूर्ण रूपमा नाफारहित बनाउनुपर्ने र सरकारी छात्रवृत्तिमा अध्ययनरत चिकित्सकको परिचालनलाई व्यवस्थित बनाउनुपर्नेमा जोड दिए ।

डा. केसीको अर्को मुख्य माग विगतमा सरकारसँग भएका सम्झौताको पूर्ण कार्यान्वयन हो । उनले सुदूरपश्चिमलगायत सीमावर्ती क्षेत्रका नागरिकको स्वास्थ्य र शिक्षाको अधिकार सुनिश्चित गर्न आवश्यक पूर्वाधार विकास गरिनुपर्ने बताएका छन्, साथै द्वन्द्वकालका पीडितलाई न्याय दिनुपर्ने, विगतका जघन्य अपराधका दोषीलाई कारबाही गरिनुपर्ने र उच्चपदस्थ राजनीतिज्ञ एवम् पदाधिकारीमाथि लागेका भ्रष्टाचारका आरोपको निष्पक्ष छानबिन गरिनुपर्ने माग पनि उनले अघि सारेका छन् ।

डा. केसीले साउन ५ गतेसम्म सरकारलाई पाँचबुँदे माग पूरा गर्न समय दिएका थिए, तर सरकारले कुनै चासो नदिएपछि पुन: सत्याग्रहमा बस्न बाध्य भएको उनको तर्फबाट विजयबाबु शिवाकोटीद्वारा जारी विज्ञप्तिमा उल्लेख छ ।

यसअघि, कैलालीका प्रमुख जिल्ला अधिकारी हीरालाल रेग्मी र जिल्ला प्रहरी कार्यालय कैलालीका प्रमुख प्रहरी उपरीक्षक नरेन्द्रबहादुर चन्दले डा. केसीलाई काठमाडौँमै अनशन बस्न सुझाव दिएका थिए । कैलालीमा स्वास्थ्य अवस्था जटिल बने उपचार व्यवस्थापन गर्न कठिन हुन सक्ने उनीहरूको भनाइ थियो ।

यता, गेटास्थित सहिद दशरथचन्द मेडिकल विश्वविद्यालय सञ्चालनको तयारी भइरहेका बेला डा. केसीको अनशनले प्रक्रिया प्रभावित हुन सक्ने भन्दै स्थानीयस्तरमा विरोध भएको बताइएको छ ।