वापी (गुजरात), जुलाई २० । रोजगारीका सिलसिलामा लामो समयदेखि भारतको गुजरातस्थित वापीमा बस्दै आएका प्युठानका तिलकबहादुर राना मगरको क्यान्सरका कारण निधन भएको छ । २० जुलाई २०२६ मा निधन भएका राना मगरको अन्तिम संस्कार मूल प्रवाह अखिल भारत नेपाली एकता समाजको समन्वयमा परिवार तथा आफन्तको उपस्थितिमा गरिएको हो ।
प्युठानको बिजुवार नगरपालिका–८, ढाडखोला निवासी राना मगर लामो समयदेखि वापीलाई आफ्नो कर्मथलो बनाउँदै आएका थिए । केही समयदेखि क्यान्सर रोगबाट पीडित उनको २० जुलाई २०२६ का दिन बिहान निधन भएको परिवारले मूल प्रवाह अखिल भारत नेपाली एकता समाजलाई जानकारी गराएको थियो ।
जानकारी पाएलगत्तै संस्थाका प्रतिनिधिहरू वापीस्थित हरिया अस्पताल पुगेका थिए । आवश्यक अस्पताल प्रक्रिया पूरा गरेपछि परिवार तथा आफन्तको उपस्थितिमा वापीस्थित दमनगंगा श्मशानभूमिमा राना मगरको अन्तिम संस्कार गरिएको थियो ।
अन्तिम संस्कारअघि उपस्थित सबैले एक मिनेट मौनधारण गरेका थिए । यसैबीच, मूल प्रवाह अखिल भारत नेपाली एकता समाजको पहलमा मृतक राना मगरको परिवारलाई क्रिया खर्चबापत २४ हजार ८५० भारतीय रुपैयाँ सहयोग गरिएको छ ।
