जनक विसी
कोचिन, १९ जुलाई २०२६ (साउन ३, २०८३) ।
दक्षिण भारतको कोचिनमा दिवंगत गिरबहादुर बुढाथोकीको स्मृतिमा शोकसभा सम्पन्न भएको छ। स्वर्गद्वारी गाउँपालिका–राजमोका उपाध्यक्ष गंगाराम बिसीका पिता गिरबहादुर बुढाथोकीको २८ असार २०८३ मा भएको असामयिक निधनप्रति श्रद्धाञ्जली अर्पण गर्न जनक बिसीको आयोजनामा १९ जुलाई २०२६ (साउन ३, २०८३) मा शोकसभा सम्पन्न गरिएको हो।
कार्यक्रममा दिवंगत बुढाथोकीको तस्वीरमा उपस्थित दाजुभाइ तथा दिदीबहिनीहरूले माल्यार्पण गर्दै भावपूर्ण श्रद्धाञ्जली अर्पण गरेका थिए।
शोकसभामा मुल प्रवाह अखिल भारत नेपाली एकता समाज चेन्नई उत्तर नगर समितिका तिलकराम कालाथोकी, मुल प्रवाह अखिल भारत नेपाली एकता समाज कोचिन नगर समितिका सचिव आशाराम घम, दक्षिण भारत क्षेत्रीय समितिका सदस्य जनक बिसी तथा क्षेत्रीय सदस्य एवं कोचिन नगर समितिका अध्यक्ष बाबुराम केसीले शोक मन्तव्य व्यक्त गरेका थिए।
सो अवसरमा वक्ता बाबुराम केसीले हिन्दू धर्ममा प्रचलित काजकिरिया तथा कर्मकाण्डका केही परम्परा वर्तमान समाजका लागि लामो र अव्यवहारिक बन्दै गएको उल्लेख गर्दै समयसापेक्ष सुधार गरी छोटो, सरल र व्यवहारिक बनाउन राज्य तथा सरकारसमक्ष संगठित रूपमा आवाज उठाउनुपर्ने आवश्यकता औँल्याए।
कार्यक्रम श्रद्धाञ्जली, शोक व्यक्त तथा दिवंगतप्रति सम्मान प्रकट गर्दै सम्पन्न भएको थियो।
