काठमाडौं । प्रदेश नम्बर ५ की सांसद कृष्णा केसीलाई कोरोना संक्रमण भएको छ । बाँकेको राप्तीसोनारी गाउँपालिका–९ निवासी सांसद केसी आफैंले फेसबुकमार्फत आफूलाई कोरोना संक्रमण पुष्टि भएको जानकारी दिनुभएको छ ।

केसी नेकपाको तर्फबाट निर्वाचन क्षेत्र १ (१) बाट प्रत्यक्ष निर्वाचित सांसद हुनुहुन्छ ।

‘संक्रमित क्षेत्रमा जनतामाझ आउजाउ गर्दा मलाई कोरोना भएको हुन सक्छ’, उहाँले लेख्नुभएको छ, ‘त्यसैले मेरो सम्पर्कमा आएका सबैजना सेल्फ आइसोलेसनमा बस्नुस् र पीसीआर परीक्षण गराउनुस् ।’

कोरोना संक्रमण बढ्दै गएपछि बाँकेको धेरैजसो स्थानीय तहमा निषेधाज्ञा जारी गरिएको छ । सांसद केसी कोरोनाकै कहरबीच विभिन्न सामाजिक राजनीतिक काममा सक्रिय हुनुभएको थियो ।