खिमराज चालिसे
भारत
भारतको हिमाचल प्रदेशमा लामो समयदेखि बिरामी भई उपचाररत रहेका दाङ जिल्लाको घोराही उपमहानगरपालिका–१९, सैधा घोडधारा निवासी गोविन्द खत्रीलाई मूल प्रवाह अखिल भारत नेपाली एकता समाजले उद्धार गरी बुधबार नेपाल पठाएको छ।
समाजका अनुसार खत्रीलाई सुरक्षित रूपमा स्वदेश फर्काउन यातायात खर्च, बाटोमा आवश्यक खानपान तथा उपचारका लागि आर्थिक सहयोगसमेत उपलब्ध गराइएको छ। समाजका कार्यकर्ता, बुद्धिजीवी र स्थानीय नेपाली समुदायको सहयोगमा भारतीय रुपैयाँ १४ हजार (करिब नेपाली रुपैयाँ २२ हजार ४ सय) संकलन गरी खत्रीलाई हस्तान्तरण गरिएको नगर अध्यक्ष सिताराम बुढाले जानकारी दिनुभयो।
खत्री विगत लामो समयदेखि हिमाचल प्रदेशको रामपुर कुमारसेन क्षेत्रमा मजदुरी गर्दै आएका थिए। करिब छ महिनाअघि बिरामी परेपछि उनी अस्पतालमा उपचाररत थिए। लामो समयसम्म उपचारमा सहयोग गर्दै आएका उनका घरमालिकले थप सहयोग गर्न नसक्ने जानकारी समाजलाई गराएपछि मूल प्रवाहका कार्यकर्ताले उद्धार प्रक्रिया अघि बढाएका थिए।
त्यसपछि संस्थाले नेपालस्थित खत्रीका परिवारसँग सम्पर्क गरी सुरक्षित रूपमा स्वदेश फर्काउने सम्पूर्ण व्यवस्था मिलाएको जनाएको छ।
प्रवासी नेपालीको समस्यामा मूल प्रवाहले देखाएको यस मानवीय पहलको स्थानीय नेपाली समुदायले प्रशंसा गरेको छ।
