महेश रिजाल, भालुबाङ ।
सशस्त्र प्रहरी बल नेपाल २९ नं. गण हेडक्वाटर भालुबाङ दाङको बाइसौँ स्थापना दिवस मनाइएको छ ।
बिन्दबासिनी गण रुपन्देहीका सशस्त्र प्रहरी नायब महानिरीक्षक दीपक अधिकारीले एक समारोहका बिच दीप प्रज्ज्वलन गरेर उद्घाटन गर्दै २०८३ साउन २ गते सो कार्यक्रम सम्पन्न भएको थियो ।
कार्यक्रममा मन्तव्य राख्दै उहाँले सशस्त्र प्रहरीको सीमा सुरक्षा र व्यवस्थापन तथा भारतीय समकक्षीसँग समन्वयकारी भूमिका खेल्नुपर्ने, साथै राज्यद्वारा प्रद्धत्त नागरिकको अधिकार स्थापनाका लागि र उनीहरूको जिउज्यानको सुरक्षा तथा अपराध नियन्त्रण र मौलिक हक दिलाउन मुख्य भूमिका रहनुपर्ने आवश्यकतामा जोड दिनुभयो ।
विशिष्ट अतिथि दाङका प्रमुख जिल्ला अधिकारी निश्चलराज पाण्डेले पनि सम्बोधन गर्नुभएको उक्त कार्यक्रममा स्वागत मन्तव्य २९ नं. हेडक्वाटर ज्वालामाई गण भालुबाङका गणपति यदुकुमार कार्कीले गर्नुभएको थियो भने कार्यक्रमको सञ्चालन सशस्त्र प्रहरी नायब उपरीक्षक इश्वर डिसीले गर्नुभएको थियो ।
कार्यक्रममा विभिन्न खेलकुद प्रतियोगिता र अतिरिक्त क्रियाकलापमा प्रथम, द्वितीय र तृतीय हुने खेलाडीलाई पुरस्कार वितरण गरिएको थियो ।
एवम् प्रकारले कर्तव्यपालनको सिलसिलामा जीवनोत्सर्ग गर्ने सशस्त्रका परिवारलाई दोसल्ला ओढाई सम्मान गर्ने कार्यक्रम पनि सम्पन्न भएको थियो ।
त्यसैगरी समारोहमा कलाकारद्वारा राष्ट्रभक्तिभावले ओतप्रोत विविध मनोरञ्जनात्मक गीत तथा नृत्य पनि प्रस्तुत गरिएको थियो ।
कार्यक्रममा विभिन्न कार्यालयका प्रमुख तथा प्रतिनिधि, वित्तीय संस्थाका प्रमुख तथा प्रतिनिधि, जिल्ला सुरक्षा निकायका प्रमुख तथा प्रतिनिधि, उद्योगी व्यवसायीका प्रतिनिधि तथा सञ्चारकर्मीको उपस्थिति रहेको थियो ।
