भारत । भारतको हिमाचल प्रदेशबाट नेपाल फर्किने क्रममा हरियाणाको करनालमा भएको सडक दुर्घटनामा एक नेपाली नागरिकको मृत्यु भएको छ। शनिबार (जुलाई ११, २०२६) भएको उक्त दुर्घटनामा ज्यान गुमाउने व्यक्तिको हालसम्म आधिकारिक रूपमा पहिचान खुल्न सकेको छैन।

प्राप्त जानकारीअनुसार हिमाचल प्रदेशको गुम्बाबाट नेपालतर्फ आउँदै गरेको HP01S-3007 नम्बरको गाडी करनाल क्षेत्रमा प्राविधिक समस्या आएपछि सडक किनारमा रोकिएको थियो। सोही क्रममा गाडीमा सवार ती व्यक्ति सडकपारि गएका थिए। केही समयपछि पुनः गाडीतर्फ फर्किने क्रममा सडक काट्दै गर्दा तीव्र गतिमा आएको एक पिकअप गाडीले उनलाई ठक्कर दिएको थियो।

ठक्करबाट उनी गम्भीर घाइते भएका थिए। स्थानीयका अनुसार उनको घटनास्थलमै मृत्यु भएको हो।

हरियाणाको शाहबादस्थित निलकण्ठ ढाबाका सञ्चालक माधवजीका अनुसार मृतक नेपालको सुदूरपश्चिम प्रदेशका हुन सक्ने अनुमान गरिएको छ। यद्यपि, उनको आधिकारिक परिचय अझै खुल्न नसकेको र पहिचानका लागि आवश्यक प्रयास जारी रहेको जनाइएको छ।

मृतकको पहिचान गरी परिवारसम्म दुःखद खबर पुर्‍याउने उद्देश्यले सम्बन्धित सबैमा सहयोगको अपिल गरिएको छ। तस्वीरमा देखिएका व्यक्तिलाई चिन्ने वा उहाँका परिवारजनबारे जानकारी हुने जो–कोहीले तल उल्लेखित नम्बरमा सम्पर्क गरिदिन अनुरोध गरिएको छ।

सम्पर्क नम्बर:

माधवजी (निलकण्ठ ढाबा): +९१ ९३०६२ ४७१८०, +९१ ९७२८४ ५८९६४

खिमराज चालिसे (सञ्चारकर्मी): +९१ ८९६८५ ०३०५०

मृतकका परिवारजनसम्म समयमै सूचना पुग्न सहयोग पुगोस् भन्ने उद्देश्यले यो समाचारलाई सकेसम्म बढीभन्दा बढी साझा (सेयर) गरिदिन सबैमा हार्दिक अनुरोध गरिएको छ।