खिमराज चालिसे, चन्डिगढ ।
भारतको पजाब राजपुरामा निधन भएका काभ्रेपलाञ्चोक जिल्ला स्थायी घर भएका २६ वर्षीय सागर नेपालको मूल प्रवाह अखिल भारत नेपाली एकता समाजको पहलमा दाहसंस्कार गरिएको छ ।
पारिवारिक सदस्य र समाजले कानुनी औपचारिकता पूरा गरी जुलाई ४, २०२६ का दिन राजपुरा बाईपासस्थित घाटमा मृतकको दाहसंस्कार गरिएको छ ।
सागरको शव स्थानीय राजपुरा नगरको फोकलप्वान्टस्थित झाडीमा फेला पारेको थियो । शव भेटिएपछि प्रहरीले नियन्त्रणमा लिएर अनुसन्धानको क्रममा मृतक नेपालको काभ्रेपालाञ्चोकको भएको पुष्टि भएको थियो । उनी गत जुन २७ देखि बेपत्ता भएको परिवारले बताएको छ । उनका बुबाको नाम उद्धव नेपाल भनिएको छ ।
मूल प्रवाहको पहलमा सागरको शवलाई पोस्टमार्टम र कानुनी प्रक्रियाका लागि सरकारी अस्पताल राजपुरामा राखिएको थियो ।
उक्त घटनाको जानकारी पाएलगत्तै मूल प्रवाह एरिया समिति राजपुराले शव व्यवस्थापनका लागि सक्रिय पहल सुरु गरेको थियो । समाजका प्रतिनिधिहरूले अस्पताल र स्थानीय प्रशासनसँग मिलेर सम्पूर्ण आवश्यक कानुनी तथा कागजी प्रक्रिया पूरा गरेका थिए ।
अन्त्येष्टिमा मूल प्रवाह राजपुरा एरिया समिति ए का अध्यक्ष दिलबहादुर सुनार, सचिव राजु वन, सल्लाहकार रमेश शाही र सदस्य भूपाल सिंह, सीताराम कोइराला, उत्तम लुइँटेल, राजपुरा एरिया समिति बीका अध्यक्ष मनु तामाङ तथा सदस्यहरू तुलसी देवी, कुसुम देवी, रञ्जिता कोइराला र मालती पुनलगायतका स्थानीय कार्यकर्ता र परिवारजनको उपस्थिति थियो ।
