काठमाडौँ । रक्तिम सांस्कृतिक अभियानका अध्यक्ष गिरीप्रसाद बुढाले ‘रक्तिम विशेष साँझ–२०८३’ अपेक्षा गरिएकोभन्दा धेरै राम्रो भएको दाबी गर्नुभएको छ ।

युगदर्शन मिडियाका लागि कार्यकारी सम्पादक प्रकाश थापामगरसित २०८३ असार १८ गते बिहान सङ्क्षिप्त भिडियो अन्तर्वार्ता दिँदै उहाँले सो दाबी गर्नुभएको हो ।

उहाँले भन्नुभयो– ‘रक्तिम विशेष साँझ–२०८३ हामीले अपेक्षा गरेकोभन्दा बढी नै राम्रो भएको महसुस गरेका छौँ ।’

अध्यक्ष बुढाले यो कार्यक्रमबाट आमजनतासँगै रक्तिम अभियानको पङ्क्तिमा समेत उत्साह बढेर गएको उहाँले जिकिर गर्नुभयो ।

‘यो कार्यक्रमले आम जनमानस र रक्तिम सांस्कृतिक अभियानभित्र पनि नयाँ उत्साह पैदा गरेको छ’ उहाँको भनाइ थियो ।

लामो समयपछि रक्तिमले यस खालको देशव्यापी सांस्कृतिक कार्यक्रम सञ्चालन गर्नुलाई एक प्रकारको दुस्साहसजस्तो पनि मानिएको उहाँको बुझाइ थियो ।

कार्यक्रम सफल पार्न आयोजकको तर्फबाट विविधता ल्याउन खोजिएको, त्यसमा समावेशिता पनि सामेल गरिएको तथा नयाँ प्रतिभालाई पनि पर्याप्त मात्रामा स्थान दिन खोजिएको उहाँले खुलासा गर्नुभयो ।

यसपटकको सांस्कृतिक अभियान रक्तिमका पुराना र नयाँ कलाकारको पुनर्मिलनजस्तो भएको सन्दर्भ जोड्दै उहाँले यसबाट सकारात्मक आशा पलाएको स्वीकार गर्नुभयो ।

‘विगतमा पलायन भएका वा निस्क्रिय भएका साथीहरूमा प्रतिकूल परिस्थितिमा पनि रक्तिम अगाडि बढिरहेको देख्दा खुसी महसुस भइरहेको छ’ उहाँले भन्नुभयो– ‘वास्तवमा रक्तिम निरन्तर अगाडि बढ्दो रहेछ भन्ने नयाँ आशा उहाँहरूमा पलाइरहेको हामीले महसुस गरेका छौँ ।’

उहाँले रक्तिमसँग जोडिएका सबै नयाँपुराना कलाकार साथीहरूलाई सक्रिय हुनका लागि, रक्तिमको सिद्धान्तप्रति प्रतिबद्ध हुनका लागि आह्वान गरिरहेको जानकारी दिनुभयो ।

उहाँले भन्नुभयो– ‘हामीले विगतमा कतिपय कारणले रक्तिमलाई छोडेर बाटो बिराएका साथीहरूलाई मूलघरमै फर्किन आह्वान गरिराखेका छौँ । धेरै साथीहरू सकारात्मक पनि देखिनुभएको छ ।’

अर्कोतर्फ उहाँले कलाक्षेत्रमा रक्तिमको पुन: सक्रियताले जनतामा पनि त्यत्तिकै आशा पलाएको बताउनुभयो ।

‘जनताले नयाँ तरिकाले, नयाँ आशाभरोसा, नयाँ उमङ्गको रूपमा रक्तिम सांस्कृतिक अभियानको कार्यक्रमलाई बुझेको पायौँ’ उहाँको भनाइ थियो ।

अभियानको क्रममा कतिपय जनताले रक्तिम निस्क्रिय भइसकेको गुनासो गरेको सन्दर्भ उहाँले यस सन्दर्भमा जोड्नुभयो ।

मोबाइल, इन्टरनेट र सामाजिक सञ्जाल जस्ता आधुनिक सूचना प्रविधिको वर्तमान युगमा रक्तिमको लाइभ कार्यक्रमको सान्दर्भिकताबारे उहाँले यसलाई जनताले झन् बढी रुचाएको बताउनुभयो ।

उहाँले भन्नुभयो– ‘हामीलाई प्रत्यक्ष रूपमै भेटेर, भौतिक रूपमै हाम्रो कार्यक्रममा उपस्थित भएर सुनेको, हेरेको कार्यक्रमको छाप दिगो रहने गरेको हामीले पायौँ ।’

अहिलेको अभियान जनतालाई सिकाउने र आफूहरूले उनीहरूबाट पनि सिक्ने रूपमा रहेको उहाँको भनाइ थियो ।

‘हामीले जे जति प्रयास गरेका थियौँ, त्यो कुरामा आंशिक रूपमा भए पनि जनताले सही कुरा बुझ्न पाएका छन्’ उहाँले भन्नुभयो– ‘हामीले पनि अहिलेको कार्यक्रममार्फत् जनताबाट धेरै कुरा सिक्न पाएका छौँ ।’

आगामी दिनमा आफ्ना कलाप्रस्तुतिमा सुधार गर्नुपर्ने आवश्यकता महसुस गरेको अध्यक्ष बुढाको स्वीकारोक्ति थियो ।

रक्तिमले मूलत: गीतिनाटक प्रदर्शन गर्ने गरेकोमा अहिलेको संवादमूलक नाटक ‘युग बोल्छ’ को प्रदर्शन आफैमा दुस्साहस भएको उहाँको भनाइ थियो ।

त्यस्तै उहाँले गीतसङ्गीत र नृत्यको क्षेत्रमा पनि पर्याप्त परिमार्जनको आवश्यकता रहेको बुढाले स्पष्ट पार्नुभयो ।

‘साधारण किसान वा साधारण मान्छेहरूले सम्म पनि बुझ्न सक्ने सरल खालको गीतसङ्गीत हामीले निर्माण गर्नुपर्छ भन्ने अनुभूति यो अभियानमा भएको छ’ उहाँको भनाइ थियो ।

अन्तर्वार्ताको क्रममा लामो समयपछि रक्तिमले महत्त्वाकाङ्क्षी कार्यक्रमको रूपमा देशव्यापी सांस्कृतिक कार्यक्रम आयोजना गरेकोमा त्यसलाई सफल पार्न सहयोग गर्ने सबैप्रति धन्यवाद ज्ञापनसमेत गर्नुभयो ।

(अन्तर्वार्ताको पूर्ण पाठका लागि युगदर्शन मिडियाको युट्युब च्यानल वाच गर्नुहोला)