खिमराज चालिसे

चण्डीगढ, २७ जुन । भारतको पंजाब राज्यअन्तर्गत मोहाली जिल्लाको डेराबस्सी तथा लालरु क्षेत्रमा प्रहरीले सञ्चालन गरेको विशेष अभियानका क्रममा २७ जुन २०२६ मा दुई नेपाली महिला अवैध लागूऔषध अफिमसहित पक्राउ परेका छन्।

पक्राउ परेका दुवै महिलालाई अदालतको आदेशपछि हाल पटियाला जेल चलान गरिएको अधिवक्ता ललिता पोखरेलले जानकारी दिनुभयो।

पोखरेलका अनुसार लालरु थाना क्षेत्रअन्तर्गत झरमडी बस स्ट्यान्ड (Jharmari Bus Stand) नजिक प्रहरीले संदिग्ध व्यक्ति तथा सवारीसाधनमाथि जाँच गरिरहेको बेला १० किलोग्राम उच्च गुणस्तरको अफिम बरामद गरेको हो।

प्रहरीका अनुसार पिठ्युँमा भारी झोला बोकेर हिँडिरहेका दुई महिलाले प्रहरीको गाडी देखेपछि उल्टो दिशातर्फ भाग्ने प्रयास गरेका थिए। उनीहरूको गतिविधि शंकास्पद लागेपछि प्रहरीले नियन्त्रणमा लिएर झोलाको खानतलासी गर्दा दुवैको झोलाबाट ५–५ किलोग्रामका दरले कुल १० किलोग्राम अफिम बरामद भएको थियो।

पंजाब प्रहरीले सार्वजनिक गरेको विवरणअनुसार पक्राउ पर्नेमा दाङ जिल्लाको गढवा गाउँपालिका–राजपुर निवासी कल्पना थापा (अशोक थापाकी श्रीमती) र लमही बजार निवासी आसा राई (वीरध्वज राईकी श्रीमती) रहेका छन्।

प्रहरीले दुवै महिलाविरुद्ध भारतको लागूऔषधसम्बन्धी कडा कानुन एनडीपीएस ऐन (Narcotic Drugs and Psychotropic Substances Act–NDPS Act) अन्तर्गत मुद्दा दर्ता गरी थप अनुसन्धान अघि बढाएको जनाएको छ।

प्रारम्भिक अनुसन्धानका आधारमा यो घटना अन्तर्राष्ट्रिय लागूऔषध तस्करी सञ्जालसँग सम्बन्धित हुन सक्ने अनुमान गरिएको अधिवक्ता पोखरेलले बताउनुभयो।

प्रहरीले बरामद गरिएको अफिम नेपालको सीमा क्षेत्रबाट पंजाबमा कसलाई पुर्‍याउन ल्याइएको थियो, यसको मुख्य योजनाकार को हो, तथा यसमा अन्य व्यक्तिको संलग्नता छ वा छैन भन्ने विषयमा गम्भीरतापूर्वक अनुसन्धान गरिरहेको जनाएको छ।