मेघराज रिष्मेली

जापान, जुन २२ । बागलुङ जिल्ला, काठेखोला गाउँपालिका–१, पाला निवासी तथा हाल रोजगारीको सिलसिलामा जापानमा कार्यरत प्रकाश भण्डारीकी श्रीमती जमुना भण्डारी (३८) लाई क्यान्सर उपचारका लागि संकलित आर्थिक सहयोग हस्तान्तरण गरिएको छ।

जमुना भण्डारी जापान पुगेको केही समयपछि स्वास्थ्य समस्याबाट पीडित हुनुभएको थियो। जापानमा उपचार गर्दा आर्थिक भार धान्न कठिन भएपछि उहाँ नेपाल फर्किनुभएको थियो। नेपालमा गरिएको स्वास्थ्य परीक्षणका क्रममा उहाँको आन्द्रामा क्यान्सर फैलिसकेको पुष्टि भएको थियो। उपचार प्रक्रिया अत्यन्त खर्चिलो हुनुका साथै परिवारको आर्थिक अवस्था कमजोर भएकाले उपचारमा सहयोग पुगोस् भन्ने उद्देश्यले सहयोग संकलन अभियान सञ्चालन गरिएको थियो।

पीडितका परिवारबाट प्राप्त निवेदनका आधारमा जापान नेपाली एकता समाजले उहाँको शीघ्र स्वास्थ्यलाभको कामना गर्दै सहयोग अभियान सुरु गरेको थियो। सोही अभियानमार्फत संकलित रकम आज, २०२६ जुन २२ मा एक कार्यक्रमका बीच हस्तान्तरण गरिएको हो।

जापान नेपाली एकता समाजका क्षेत्रीय अध्यक्ष भुवन सापकोटाको अध्यक्षतामा सम्पन्न कार्यक्रममा समाजका केन्द्रीय सल्लाहकार भीम केसी, केन्द्रीय सल्लाहकार मनबहादुर सलामी, केन्द्रीय उपाध्यक्ष तेजेन्द्र क्षेत्री तथा पत्रकार मेघराज रिष्मेलीको उपस्थिति रहेको थियो।

उक्त कार्यक्रममा संकलित नगद २ लाख ७३ हजार ६६६ येन पीडित जमुना भण्डारीका श्रीमान् प्रकाश भण्डारीलाई हस्तान्तरण गरिएको थियो।

कार्यक्रममा सहभागी वक्ताहरूले जमुना भण्डारीको शीघ्र स्वास्थ्यलाभको कामना गर्दै सहयोगी मनहरूलाई धन्यवाद व्यक्त गरेका थिए । त्यस्तै कार्यक्रममा क्षेत्रीय सदस्य नरेश खत्री को उपस्थिति थियो ।