हैद्राबाद, असार ७ । भारतको हैद्राबादस्थित सापुनगर कम्युनिटी हलमा आइतबार मुल प्रवाह मध्य–दक्षिण क्षेत्रीय समितिको आयोजनामा सम्मान तथा बिदाइ कार्यक्रम सम्पन्न भएको छ।
कार्यक्रममा मुल प्रवाह मध्य–दक्षिण क्षेत्रीय सदस्य एवं महिला विभाग संयोजक पुष्पा पौडेल, महिला विभाग सदस्य देवी शर्मा तथा विद्यार्थी नेता एवं रक्तिम कलाकार हिमाल पौडेललाई सम्मानसहित बिदाइ गरिएको थियो।
मुल प्रवाहका केन्द्रीय सदस्य तथा केन्द्रीय महिला विभाग संयोजक फुलबिना पौडेलको प्रमुख आतिथ्यतामा सम्पन्न कार्यक्रममा केन्द्रीय सदस्य कृष्ण थापा, रक्तिम क्षेत्रीय संयोजक माया थापा, मध्य–दक्षिण क्षेत्रीय उपाध्यक्ष गगनसिंह विक, उत्तर नगर अध्यक्ष सूर्यबहादुर थापा, मध्य नगर सचिव कुमार थापा, महिला उत्तर समिति संयोजक लक्ष्मी थापा, मध्य नगर संयोजक सबिता पौडेललगायतको उपस्थिति रहेको थियो।
अतिथिहरूको आसन ग्रहणपछि सहिदहरूप्रति एक मिनेट मौनधारण गरिएको थियो। त्यसपछि केन्द्रीय सदस्य फुलबिना पौडेल, कृष्ण थापा तथा क्षेत्रीय अध्यक्ष खिमबहादुर विकले दोसल्ला, माला र अबिर लगाई बिदाइ हुने व्यक्तित्वहरूलाई सम्मान गर्नुभएको थियो।
कार्यक्रमलाई सम्बोधन गर्दै प्रमुख अतिथि फुलबिना पौडेलले प्रवासमा रहेका नेपालीहरूको समस्या समाधानका लागि निरन्तर सक्रिय रहँदै संगठनमा महत्वपूर्ण योगदान पुर्याएको भन्दै पुष्पा पौडेल, देवी शर्मा र हिमाल पौडेलको प्रशंसा गर्नुभयो। उहाँले स्वदेश फर्किएपछि पनि राष्ट्रिय जनमोर्चा तथा त्यसका जनवर्गीय संगठनमार्फत देश र जनताको पक्षमा सक्रिय रहने विश्वास व्यक्त गर्नुभयो।
बिदाइ मन्तव्यका क्रममा पुष्पा पौडेलले लामो समय एउटै परिवारझैँ भएर काम गरेका साथीहरूबाट छुट्टिँदा भावुक भएको बताउँदै आफूले संगठनमा गरेको कार्य सम्पूर्ण नेतृत्व तथा साथीहरूको सहयोगकै परिणाम भएको उल्लेख गर्नुभयो। उहाँले स्वदेशमा पनि देश र जनताको हितमा निरन्तर सक्रिय रहने प्रतिबद्धता व्यक्त गर्नुभयो। देवी शर्मा र हिमाल पौडेलले पनि सोही प्रतिबद्धता व्यक्त गरेका थिए।
कार्यक्रममा उपस्थित वक्ताहरूले बिदाइ हुने तीनै जनाले संगठनमा पुर्याएको योगदानको प्रशंसा गर्दै आगामी यात्राका लागि शुभकामना व्यक्त गरेका थिए।
क्षेत्रीय अध्यक्ष खिमबहादुर विकको अध्यक्षतामा सम्पन्न कार्यक्रमको सञ्चालन सचिव तिलक रानाले गर्नुभएको थियो भने कोषाध्यक्ष घनश्याम शर्माले अतिथि तथा सहभागीहरूलाई स्वागत गर्नुभएको थियो।
