काठमाडौं, असार ७ । घातक एभियन इन्फ्लुएन्जा (बर्डफ्लु) संक्रमण काठमाडौं उपत्यकासहित देशका विभिन्न जिल्लामा तीव्र रूपमा फैलिएको छ। काठमाडौं, ललितपुर र भक्तपुर बर्डफ्लुको मुख्य ‘हटस्पट’ बनेका छन्।
पशु सेवा विभागका अनुसार व्यावसायिक कुखुरासँगै रैथाने तथा जंगली पक्षी, विशेषगरी कागमा समेत संक्रमण पुष्टि भएपछि नियन्त्रण चुनौतीपूर्ण बनेको छ। हालसम्म देशभर करिब ६ लाख कुखुरा तथा अन्य पक्षी र १० लाखभन्दा बढी अण्डा नष्ट गरिएको छ।
विभागका महानिर्देशक डा. उमेश दाहालका अनुसार कुल संक्रमणको ९० प्रतिशतभन्दा बढी हिस्सा काठमाडौं उपत्यकामा केन्द्रित छ। जैविक सुरक्षा कमजोर भएका काँठ तथा ग्रामीण क्षेत्रमा स्थानीय कुखुरा र जंगली चराको सम्पर्कका कारण संक्रमण तीव्र रूपमा फैलिएको पाइएको छ।
बर्डफ्लुको त्रासका कारण काठमाडौं उपत्यकामा कुखुराको मासुको खपत २० देखि ३० प्रतिशतसम्म घटेको छ। यद्यपि, संक्रमित फार्मलाई तत्काल सिल गरी कुखुरा तथा अण्डा नष्ट गरिने भएकाले बजारमा असुरक्षित मासु पुग्ने सम्भावना न्यून रहेको विभागले जनाएको छ।
हालसम्म नेपालमा मानिसमा बर्डफ्लु सरेको घटना पुष्टि नभएको भन्दै विभागले मासु र अण्डा राम्ररी पकाएर उपभोग गर्न आग्रह गरेको छ। संक्रमण नियन्त्रणका लागि विभागले उच्चस्तरीय समीक्षा, कडाइका साथ जैविक सुरक्षा उपाय कार्यान्वयन तथा मानव स्वास्थ्य निगरानीलाई तीव्रता दिएको जनाएको छ।
