हैदराबाद, असार ४ । भारतको हैदराबादमा कार्यरत प्युठानको स्वर्गद्वारी नगरपालिका–५, सारी स्यानिलेख निवासी ५० वर्षीय रेखबहादुर थापाको हृदयाघातका कारण निधन भएपछि मूल प्रवाह अखिल भारत नेपाली एकता समाजको रोहवरमा दाहसंस्कार गरिएको छ।
थापालाई गत असार २ गते (१६ जुन २०२६) ड्युटीका क्रममा अचानक हृदयाघात भएको थियो। कम्पनीले तत्काल उपचारका लागि स्तरीय अस्पतालतर्फ लैजाने प्रयास गरे पनि बाटोमै उनको निधन भएको जनाइएको छ।
घटनाबारे चेन्नईमा रहेका मृतकका आफन्त तथा मुल प्रवाह चेन्नई उत्तर नगर समितिका सदस्य विष्णु थापामार्फत केन्द्रीय अध्यक्ष प्रेम पौडेललाई जानकारी गराइएको थियो। त्यसपछि मुल प्रवाह मध्य–दक्षिण क्षेत्रीय समितिका अध्यक्ष खिमबहादुर विकको पहलमा आवश्यक छलफल गरी केन्द्रीय सदस्य तथा दक्षिण हैदराबाद नगर समितिका अध्यक्ष के. रतनसिंह कर्माको नेतृत्वमा टोली परिचालन गरिएको थियो।
टोलीमा केन्द्रीय सदस्य कृष्णबहादुर थापा, दक्षिण हैदराबाद नगर समितिका कोषाध्यक्ष भूपाल ठाडा मगर, सहसचिव तथा आफन्त नुमलाल राहु मगर, नगर सदस्य रुद्र विक, चेन्नईबाट आएका मृतकका छोरा पुष्कर थापा तथा विष्णु थापा सहभागी थिए। टोलीले थापा कार्यरत कम्पनी दिशा फुड प्रालि पुगेर कम्पनी प्रशासनसँग मृत्युसम्बन्धी जानकारी तथा परिवारलाई क्षतिपूर्तिको विषयमा छलफल गरेको थियो।
कम्पनीका मालिक बाहिर रहेकाले तत्काल निर्णय हुन नसके पनि परिवारलाई उचित क्षतिपूर्ति उपलब्ध गराउने प्रतिबद्धता कम्पनी प्रशासनले जनाएको बताइएको छ। आवश्यक अस्पताल प्रक्रिया पूरा गरी गत असार ४ गते (१८ जुन २०२६) स्थानीय श्मशानघाटमा थापाको दाहसंस्कार गरिएको थियो।
हालसम्मको सम्पूर्ण उपचार, दाहसंस्कार तथा नेपाल आवतजावतसम्बन्धी खर्च कम्पनीले व्यहोरेको जनाइएको छ। क्रियाकर्म सम्पन्न भएपछि परिवारका सदस्यहरू हैदराबाद आएर बाँकी प्रक्रिया पूरा गर्ने निर्णयसमेत भएको बताइएको छ।
दाहसंस्कार कार्यक्रममा डोमबहादुर थापा, कमल थापा, इन्द्रबहादुर थापा, उद्यम बुढाथोकीलगायत प्रवासी नेपाली तथा कम्पनीका कर्मचारीहरूको उपस्थिति रहेको थियो।
