– दीप गोले तामाङ

तिम्रो त्यो छातीमा देशप्रेमको कुनै भावना छैन।
तिमी कायर हौ,
तिमी डरपोक हौ,
तिमीसँग लड्ने कुनै तागत छैन,
साहस छैन।

तिमी
केवल सत्ता र स्वार्थमा लिप्त छौ।
तिमी विदेशीका भक्त हौ,
तिमी अरूको निर्देशनमा चल्ने गर्छौ।
तिमी माटोलाई बेच्न तयार छौ,
भाइ–भाइलाई लडाउन तयार छौ।

त्यसैले
म व्यक्तिगत स्वार्थभन्दा माथि उठेर,
देशलाई सर्वोच्च स्थानमा राखेर,
कुनै स्वार्थ नबोकी,
सर्वस्व त्यागेर लागेको छु।

मेरो हृदयमा देशको चित्र कोरेर,
म लडिरहेको छु आफ्नै स्वार्थविरुद्ध।
म तोडिरहेको छु आफ्नै घमण्डको पहाड,
म पन्छीजस्तै स्वतन्त्रताको खोजीमा छु।

मेरो रूपले, मेरो सौन्दर्यले,
मेरो धनले
मभित्र दुश्मनको मोर्चा बनाएको छ।
मभित्र देशद्रोहको भावना लुकेको छ।

त्यसैले
म
यसलाई निमोठ्दै,
अझ स्पातजस्तै बलियो बन्दै,
म
संसारभरिका
मजदुरका,
किसानका,
महिलाका,
युवाका,
विद्यार्थीका
सपना बोकेर,
आम शोषित–पीडित जनताको
पक्षमा उभिँदै,
आज इन्क्लाबको नारा लगाउँदै
हिँड्दैछु
जनताको गाउँ–बस्तीमा,
सहरमा।

अब यो लडाइँ
युरोपमा, अमेरिकामा, एसियामा
र नेपालमा पनि चल्नेछ।

२०८३/०२/३१ गते
सन्धिखर्क, अर्घाखाँची