काठमाडौँ, ३१ जेठ । देशको मौसममा फेरि बदलीको प्रभाव देखिन थालेको छ। उपल्लो वायुमण्डलमा सक्रिय पश्चिमी न्यून चापीय रेखा (ट्रफ) तथा स्थानीय र पूर्वीय वायुको संयुक्त प्रभावका कारण देशका विभिन्न क्षेत्रमा वर्षा को सम्भावना रहेको छ।
जल तथा मौसम पूर्वानुमान महाशाखाका अनुसार हाल कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी तथा हिमाली क्षेत्रमा सामान्यदेखि आंशिक बदली रहेको छ। मधेस प्रदेशमा आंशिक बदली देखिएको छ भने सुदूरपश्चिमको तराई क्षेत्रमा मौसम मुख्यतः सफा छ। अहिले कोशी, बागमती र गण्डकी प्रदेशका केही स्थानमा हल्कादेखि मध्यम वर्षा भइरहेको छ।
महाशाखाले आज दिउँसो कोशी प्रदेशसहित देशका हिमाली क्षेत्रमा सामान्य बदली रहने जनाएको छ। पहाडी भूभाग तथा मधेस, बागमती र गण्डकीका तराई क्षेत्रमा आंशिक बदली रहने सम्भावना छ भने अन्य तराई क्षेत्रमा मौसम अधिकांश समय सफा रहने अपेक्षा गरिएको छ।
पूर्वानुमानअनुसार कोशी प्रदेशका केही स्थान तथा देशका पहाडी र हिमाली क्षेत्रका केही ठाउँमा मेघगर्जन र चट्याङसहित मध्यम वर्षा हुन सक्छ। उच्च हिमाली क्षेत्रमा हल्का हिमपातको सम्भावना पनि रहेको छ। यस्तै, बागमती र गण्डकीका तराई क्षेत्र तथा मधेस प्रदेशका एक–दुई स्थानमा पनि मेघगर्जनसहित वर्षा हुन सक्ने मौसमविद्ले बताएका छन्।
आज राति पनि कोशी, मधेस, बागमती र गण्डकी प्रदेशका साथै पहाडी तथा हिमाली क्षेत्रमा आंशिक बदली कायम रहनेछ। कोशी प्रदेशका केही स्थानमा मेघगर्जनसहित वर्षा जारी रहने सम्भावना छ भने उच्च हिमाली क्षेत्रमा हिमपात हुन सक्ने अनुमान गरिएको छ। बागमती र गण्डकी प्रदेशका केही स्थानमा हल्का वर्षा तथा हिमपातको सम्भावना रहेको छ।
मौसमविद्हरूले मेघगर्जन, चट्याङ, वर्षा तथा हिमपातका कारण जनजीवन र दैनिक गतिविधिमा असर पर्न सक्ने भएकाले आवश्यक सतर्कता अपनाउन सर्वसाधारणलाई आग्रह गरेका छन्।
