ढोरपाटन नगरपालिका–५ प्याङखोलामा गएराति बोबाङबाट सालझण्डी–ढोरपाटन सडकको वैकल्पिक मार्ग हुँदै बुर्तिबाङ बजारतर्फ आउँदै गरेको ग१त ६९८० नम्बरको ट्याक्टर दुर्घटनाग्रस्त भएको हो।
दुर्घटनामा ट्याक्टर चालक ढोरपाटन नगरपालिका–६, चामीदुवार निवासी १८ वर्षीय आशिष घर्तीको मृत्यु भएको इलाका प्रहरी कार्यालय बुर्तिबाङका प्रमुख प्रहरी निरीक्षक तिलक मानन्धरले जानकारी दिनुभयो।
प्रहरीका अनुसार ट्याक्टर सडकबाट करिब ५० मिटर तल खसेको थियो भने चालकको शव दुर्घटनास्थलभन्दा करिब ७० मिटर तल फेला परेको थियो।
मध्यरातमा दुर्घटना भएकाले उद्धार तथा खोजी कार्यमा केही कठिनाइ भएको प्रहरीले जनाएको छ। घटनास्थलबाट शव निकालेर आवश्यक प्रक्रिया अघि बढाइएको छ।
प्रहरी निरीक्षक मानन्धरका अनुसार दुर्घटना राति करिब १ बजेतिर भएको थियो। घटनाबारे जानकारी पाएलगत्तै प्रहरी टोली घटनास्थलमा पुगेको र खोजतलासका क्रममा चालकको शव फेला परेको उहाँले बताउनुभयो।
“ट्याक्टरमा अन्य व्यक्ति पनि सवार थिए कि भन्ने आशंकामा खोजी गरिएको थियो। तर चालक मात्रै रहेको पुष्टि भएको छ,” उहाँले भन्नुभयो।
दुर्घटनाको कारणबारे थप अनुसन्धान भइरहेको प्रहरीले जनाएको छ।
