काठमाडौँ । नेपाल–भारत सीमाक्षेत्रसँग सम्बन्धित एउटा भिडियो यतिबेला सामाजिक सञ्जालमा तीव्र रूपमा फैलिएको छ । भिडियोमा केही व्यक्तिहरूले “रुक जाइए”, “यो नेपाली भूमि हो” लगायतका अभिव्यक्ति प्रयोग गर्दै सीमाक्षेत्रमा प्रवेश गरेका भारतीय सुरक्षाकर्मीहरू खेदाएका छन् ।
भिडियोमा बोल्ने व्यक्तिले उक्त क्षेत्र नेपालकै भूमि भएको दाबी गर्दै बाह्य पक्षलाई त्यहाँ नआउन चेतावनी दिएका छन् । साथै, सीमाक्षेत्रमा गस्ती, प्रशासनिक अधिकार र भूमि सम्बन्धी विषयमा समेत ति व्यक्तिे प्रश्न उठाएका छन् ।
सामाजिक सञ्जालमा भिडियो सार्वजनिक भएपछि नेपाली प्रयोगकर्ताहरूले सीमा सुरक्षा, राष्ट्रिय स्वाभिमान र सीमा व्यवस्थापनका विषयमा विभिन्न प्रतिक्रिया दिएका छन् । केहीले सीमाक्षेत्रमा सरकारी निकायको सक्रियता बढाउनुपर्ने बताएका छन् भने केहीले घटनाको वास्तविकता छानबिन गर्न माग गरेका छन् ।
यद्यपि, भिडियो कहाँ र कहिले खिचिएको हो तथा त्यसमा गरिएको दाबी कति सत्य हो भन्ने विषय स्वतन्त्र रूपमा पुष्टि हुन बाँकी छ । सम्बन्धित निकायबाट पनि हालसम्म औपचारिक प्रतिक्रिया सार्वजनिक भएको छैन ।
