मान्म (कालीकोट), जेठ २८ — लगातारको वर्षापछि पहिरो र लेदोले अवरुद्ध बनेको कर्णाली करिडोर आज बिहानदेखि एकतर्फी रूपमा सञ्चालनमा आएको छ।
मङ्गलबार र बुधबार परेको अविरल वर्षाका कारण कर्णाली करिडोरअन्तर्गत कालीकोटको नरहरिनाथ गाउँपालिका–८ खुलालुदेखि बाजुराको सिमाना लैफुसम्म विभिन्न स्थानमा पहिरो खस्दा सडक अवरुद्ध भएको थियो। दुई दिनको प्रयासपछि सडकमा थुप्रिएको पहिरो र लेदो हटाएर यातायात सञ्चालनमा ल्याइएको जिल्ला प्रशासन कार्यालय कालीकोटले जनाएको छ।
प्रशासनका अनुसार सुर्खेत–हुम्ला सडकखण्डअन्तर्गत खुलालु–लैफु क्षेत्रमा अझै माथिल्लो भिरालोबाट ढुङ्गा खस्ने जोखिम कायम छ। सडक साँघुरो हुनुका साथै धेरै स्थानमा एकतर्फी सञ्चालन भइरहेकाले यात्रु तथा सवारी चालकलाई विशेष सावधानी अपनाउन आग्रह गरिएको छ।
सहायक प्रमुख जिल्ला अधिकारी तथा सूचना अधिकारी जनक शर्माले मौसम प्रतिकूल रहेकाले यात्रा गर्दा सतर्क रहन र सुरक्षा निर्देशिका पालना गर्न सबैलाई अनुरोध गर्नुभएको छ।
