काठमाडौं । प्रधानमन्त्री बालेन शाहले प्रतिनिधिसभा सदस्य सुधन गुरुङलाई गृहमन्त्रीमा नियुक्तिका लागि राष्ट्रपति रामचन्द्र पौडेल समक्ष सिफारिस गरेका छन्। गुरुङले आज दिउँसो ३ बजे राष्ट्रपति पौडेलबाट पद तथा गोपनीयताको शपथ लिने कार्यक्रम रहेको छ।
यसअघि गुरुङ चैत १३ गते गृहमन्त्री नियुक्त भएका थिए। तर, उनको सम्पत्ति विवरण सम्बन्धी विषयमा सार्वजनिक रूपमा प्रश्न उठेपछि उनले पदबाट राजीनामा दिएका थिए।
गुरुङको कार्यकाल तथा उनीसँग सम्बन्धित सार्वजनिक सरोकारका विषयहरूको अध्ययन र छानबिन गर्न सरकारले पूर्वन्यायाधीश अच्युतप्रसाद भण्डारीको अध्यक्षतामा समिति गठन गरेको थियो । उक्त समितिले आफ्नो प्रतिवेदन गत शुक्रबार प्रधानमन्त्री शाहलाई बुझाएको थियो ।
आज बसेको मन्त्रिपरिषद् बैठकले समितिद्वारा पेस गरिएको प्रतिवेदन ग्रहण गर्दै गुरुङलाई पुनः गृहमन्त्रीमा सिफारिस गर्ने निर्णय गरेको हो।
त्यसैगरी, प्रधानमन्त्री शाहले प्रतिनिधिसभा सदस्य महावीर पुनलाई विज्ञान, प्रविधि तथा नवप्रवर्तन मन्त्रीमा नियुक्तिका लागि राष्ट्रपति समक्ष सिफारिस गरेका छन्। पुनले पनि आजै राष्ट्रपति पौडेलबाट पद तथा गोपनीयताको शपथ लिने कार्यक्रम तय भएको छ।
नयाँ नियुक्तिसँगै सरकारले गृह प्रशासन तथा विज्ञान–प्रविधि क्षेत्रको नेतृत्वलाई थप प्रभावकारी बनाउने अपेक्षा गरिएको छ।
