नगरपालिकाले सोमबार सार्वजनिक सूचना जारी गर्दै सडकको अधिकार क्षेत्र तथा सडकपेटी अवरुद्ध हुने गरी निर्माण गरिएका पक्की संरचना, बरन्डा तथा टिनका अस्थायी संरचना हटाउन अनुरोध गरेको हो।
नगर कार्यपालिकाको जेठ २२ गते बसेको २३८औँ बैठकको निर्णयअनुसार ३५ दिने सूचना जारी गरिएको नगरपालिकाका इन्जिनियर अमृत केसीले जानकारी दिनुभयो।
उहाँका अनुसार सूचनामा तोकिएको अवधिभित्र सार्वजनिक तथा सरकारी जग्गामा निर्माण गरिएका संरचना सम्बन्धित घरधनीले स्वेच्छाले हटाई नगरपालिकालाई सहयोग गर्न आग्रह गरिएको छ।
नगरपालिकाले तोकिएको समयसीमाभित्र संरचना नहटाइए प्रचलित कानुनबमोजिम आवश्यक प्रक्रिया पूरा गरी त्यस्ता संरचना हटाइने जनाएको छ।
इन्जिनियर केसीले सरकारी तथा सार्वजनिक सम्पत्तिको संरक्षण सबै नागरिकको साझा दायित्व भएको उल्लेख गर्दै सम्बन्धित घरधनी तथा सरोकारवालाहरूलाई सूचनाको पालना गर्न आग्रह गर्नुभयो।
“सरकारी तथा सार्वजनिक जग्गाको संरक्षण गर्नु सबै नगरवासीको कर्तव्य हो। त्यसैले सार्वजनिक हितका लागि नियमविपरीत निर्माण गरिएका संरचना हटाउन सम्बन्धित पक्षसँग सहयोगको अपेक्षा गरेका छौँ,” उहाँले भन्नुभयो।
