काठमाडौँ । प्रगतिशील लेखक सङ्घ वैचारिक विमर्श तथा परिसंवाद विभागको आयोजनामा सिन्धुपाल्चोकको मुडेमा विचार चौतारी–८६ भव्यताका साथ सम्पन्न भएको छ ।
जनगायक जीवन शर्माको उपस्थिति तथा स्थानीय पर्यटन तथा उत्पादनका साथै प्रगतिशील साहित्यलाई समन्वय गर्ने उद्देश्यका साथ विविध साहित्यिक गतिविधिसँगै २०८३ जेठ २४ र २५ सो कार्यक्रम सम्पन्न भएको थियो ।
दुईदिने उक्त कार्यक्रमको सिलसिलामा सिन्धुपाल्चोकसँगै र दोलखाको सैलुङमा पनि कार्यक्रम सम्पन्न भएको थियो ।
विभागको छयासिऔँ विचारचौतारी शृङ्खलाअन्तर्गत सम्पन्न कार्यक्रमको विषयवस्तु प्रगतिशील आन्दोलनमा गीत तथा कविताको योगदान रहेको थियो ।
आलुबाली विकास केन्द्र मुडे सिन्धुपाल्चोकमा आयोजनमा भएको विचारचौतारी कार्यक्रम प्रमुख वक्तामा जनगायक जीवन शर्मा र सङ्घकी केन्द्रीय सल्लाहकार डा. बिन्दु शर्मा हुनुहुन्थ्यो । कार्यक्रमको विशिष्ट अतिथिमा प्रगतिवादी साहित्यकार सरल सहयात्री, लिशङ्खुपाखर गाउँपालिका अध्यक्ष राजु लामाका साथै सङ्घका सल्लाहकारहरू सीता शर्मा । शोभा दुलाल हुनुहुन्थ्यो ।
अन्तरक्रियात्मक प्रकारले चलेको कार्यक्रम विभागका अध्यक्ष समीर सिंहको अध्यक्षता, सङ्घका उपाध्यक्ष डा. अमृता शर्माको सञ्चालन तथा सचिवालय सदस्य दिनेश दुलालको स्वागत मन्तव्यका साथ अगाडि बढेको थियो ।
कार्यक्रमको अन्त्यमा विभाग सदस्य दुर्गा परियारले धन्यवाद मन्तव्य राख्नुभएको थियो ।
कार्यक्रममा पूरक टिप्पणी राख्नेहरूमा प्रोल्लास सिन्धुलीय, नमुना शर्मा, भक्त विश्वकर्मा, भीष्म जोशी, शेखर अर्याललगायत हुनुहुन्थ्यो ।
कार्यक्रममा जनगायक आरोहले प्रगतिशील गीतसमेत प्रस्तुत गर्नुभएको थियो ।
पहिलो दिन दोलखाको कालापानीदेखि दोलखा र रामेछापको सिमानाअन्तर्गत तीन हजार एक सय ४६ मिटरको उचाइमा रहेको सैलुङको थुम्कोसम्म साहित्यिक पदयात्रा सम्पन्न भएको थियो ।
काठमाडौँ उपत्यकाबाट गएका २९ जना प्रगतिशील स्रष्टाका साथै सिन्धुपाल्चोक र दोलखाकाका स्थानीय स्रष्टाको सहभागितामा सो कार्यक्रम सम्पन्न भएको थियो । सो अवधिमा सैलुङको प्राकृतिक सौन्दर्यमा रमाउँदै विभिन्न गीत तथा कवितासमेत प्रस्तुत भएको थियो ।
कार्यक्रमको दोस्रो दिन बिहानै मुडेको भ्यू टावरसम्म साहित्यिक पदयात्रा तथा साहित्यिक प्रस्तुतिसमेत भएको थियो । दोस्रो दिनको दिउँसो १२ बजेबाट स्थानीय सङ्घसंस्थाको आयोजना तथा प्रलेसको सहकार्यमा ‘प्रथम मुडे कविता महोत्सव’ कार्यक्रम सम्पन्न भएको थियो ।
सारथी अभियान नेपालकी संयोजक सुमित्रा अधिकारीको अध्यक्षता तथा प्रलेसका सचिवालय सदस्य दिनेश दुलालको सञ्चालनमा अगाडि बढेको उक्त कार्यक्रमको प्रमुख अतिथि लिशङ्खुपाखर गाउँपालिका अध्यक्ष राजु लामा हुनुहुन्थ्यो ।
काठमाडौँबाट गएका स्रष्टालाई स्थानीय मुडेको आलु प्रवर्धन गर्ने उद्देश्यका साथ आलुका पात र मुडेको आलुले बनाएको माला लगाएर स्वागत गरिएको थियो ।
कार्यक्रममा जनगायक जीवन शर्मा तथा आरोह नेपालीका विभिन्न साङ्गीतिक प्रस्तुतिका, सङ्घका विभिन्न प्रगतिशील स्रष्टाका साथै स्थानीय विद्यालयका बालबालिका तथा शिक्षकले गीत तथा कविता प्रस्तुत गर्नुभएको थियो । त्यसरी प्रस्तुति दिनेमा सीता शर्मा, समीर सिंह, शेखर अर्याल, दुर्गा परियार, नमुना शर्मा, बाबा बस्नेत, प्रोल्लास सिन्धुलीय, अच्युत घिमिरे, भीष्म जोशी, भक्त विश्वकर्मा, केशु कार्की, डा. यादेवी ढकाल, पार्वती राउत, वासुदेव पौडयाल, यदुनाथ बसन्तपुरे, रमेश पौडेल, कृष्णप्रसाद दुमरु, चन्द्र न्यौपाने, विष्णु परियार, बालकवि सान्वी जोशीलगायत हुनुहुन्थ्यो ।
कार्यक्रमको अन्त्यमा प्रमुख अतिथि लामाले प्रगतिशील स्रष्टालाई मायाको चिनो र प्रमाणपत्र प्रदान गर्नुभएको थियो ।
कार्यक्रममा सहभागी हुने अन्य स्रष्टामा डा. प्रतिभा पुन, प्राज्ञ अगिव बनेपाली, इसु भट्ट, सगर सुवेदी, सहारा थापा, प्रेम कार्कीलगायत हुनुहुन्थ्यो ।
