काठमाडौं । कोरोना संक्रमण समुदायस्तरमा फैलिएपछि बारा र पर्सामा अनिश्चितकालीन कर्फ्यू लगाइएको छ । जिल्ला प्रशासन कार्यालय बारा र पर्साले छुट्टाछुट्टै आदेश जारी गरी आजदेखि अर्को सूचना नभएसम्म कर्फ्यू लगाइएको हो ।
पर्सामा आजमात्रै थप ७३ जनालाई कोरोना संक्रमण पुष्टि भएको छ । पर्साको वीरगन्जस्थित नारायणी उपक्षेत्रीय अस्पतालको प्रयोगशालाबाट गरिएको परीक्षणमा ६१ पुरुष र १२ महिलामा कोरोना भाइरस रहेको पुष्टि भएको हो।
तीमध्ये भारतीय नागरिक १ र बारा जिल्लाका २ जना छन्, अरू सबै पर्सा नै घर भएका छन् । थपिएका संक्रमितमा नेपाल प्रहरीका २ जना, नेपाली सेनाका १ जना, पर्साका १ पत्रकार पनि छन्।
ठूलो संख्यामा दैनिक संक्रमित थपिन थालेपछि पर्सा जिल्ला प्रशासन कार्यालयले आजदेखि जिल्लाभर अनिश्चितकालीन निषेधाज्ञा जारी गरेको हो ।
साउन १० गतेदेखि वीरगन्ज महानगर क्षेत्रभित्र मात्रै लागू निषेधाज्ञा आज सोमबार बिहानै ५ बजेदेखि जिल्लाभर विस्तार गरिएको हो। निषेधाज्ञा अवधिभर औषधि उपचार तथा अन्य अत्यावश्यक कामबाहेक घर बाहिर ननिस्कन स्थानीयलाई जिल्ला प्रशासनले आग्रह गरेको छ।
बारामा अनिश्चितकालीन निषेधाज्ञा
यता, छिमेकी जिल्ला पर्सामा कोरोना संक्रमण व्यापक बनेपछि बारामा पनि स्थानीय प्रशासनले आइतबारदेखि निषेधाज्ञा जारी गरेको छ।
शुक्रबार साँझ बसेको जिल्ला सुरक्षा समितिको बैठकले आम नागरिकको जीवन रक्षा तथा कोरोना नियन्त्रण गर्न उक्त निर्णय गरेको प्रमुख जिल्ला अधिकारी पण्डितले जारी गरेको विज्ञप्तिमा जनाइएको छ ।
प्रमुख जिल्ला अधिकारी पण्डितका अनुसार पर्सा र बारा दुइटा जिल्ला भए पनि एउटैजस्तो छ। पर्साका ९० प्रतिशत मानिस बारामा जागिर गर्छन् ।
