काठमाडौं, २५ जेठ । विश्व बजारमा कच्चा तेलको मूल्य एकै दिन ३ प्रतिशतभन्दा बढीले उकालो लागेको छ। मध्यपूर्वमा पुनः चर्किएको सुरक्षा संकट र इरान–इजरायलबीच बढ्दो सैन्य तनावका कारण ऊर्जा आपूर्तिमा जोखिम बढ्ने आशंकाले तेल बजारमा तीव्र दबाब सिर्जना गरेको हो।
ब्रेन्ट क्रुडको मूल्य ३.४० डलरले बढ्दै प्रतिब्यारेल ९६.४९ डलरमा पुगेको छ भने अमेरिकी डब्लुटीआई क्रुड ३.२५ डलरले वृद्धि भई ९३.७९ डलर प्रतिब्यारेलमा कारोबार भइरहेको छ। विश्लेषकहरूका अनुसार, मध्यपूर्वमा अस्थिरता गहिरिँदै जाँदा विश्व ऊर्जा आपूर्ति शृंखलामा प्रत्यक्ष असर पर्न थालेको छ।
इरानको इस्लामिक रिभोलुसनरी गार्ड कोर (आईआरजीसी) ले इजरायलमाथिको क्षेप्यास्त्र आक्रमण आगामी एक सातासम्म निरन्तर रहने चेतावनी दिएको छ। यसैबीच, अमेरिकी राष्ट्रपति डोनाल्ड ट्रम्पले इजरायललाई तत्काल प्रतिशोधात्मक कदमबाट बच्न आग्रह गर्दै इरानसँग कूटनीतिक सम्झौताको सम्भावना अझै जीवित रहेको संकेत गरेका छन्।
तर, इजरायली सैन्य नेतृत्वले आवश्यक आदेश प्राप्त भएमा थप आक्रमण जारी रहने स्पष्ट संकेत दिएपछि तनाव झन् चुलिएको छ। यसले विश्व बजारमा तेल आपूर्तिको स्थिरतामाथि गम्भीर प्रश्न उठाएको छ र आगामी दिनमा मूल्य अझै अस्थिर हुन सक्ने अनुमान गरिएको छ।
