बुटवल । राष्ट्रिय जनमोर्चाका अध्यक्ष चित्र बहादुर केसीले वर्तमान सरकार फासिवादतर्फ उन्मुख भएको बताउनु भएको छ ।
१३७औँ अन्तर्राष्ट्रिय श्रमिक दिवसको अवसरमा बुटवलमा आयोजित कार्यक्रमलाई सम्बोधन गर्दै केसीले सरकारले लोकतान्त्रिक अधिकारहरू सीमित गर्दै विद्यार्थी संगठनहरू मात्र होइन, मजदुर संगठनहरूलाई समेत नियन्त्रण वा प्रतिबन्ध लगाउने नीति अपनाइरहेको बताउनुभयो ।
सरकार विदेशी प्रभावमा सञ्चालन भइरहेको बताउनु भयो– ‘विशेषगरी अमेरिकी युथ काउन्सिललाई मान्यता दिन खोजिएको विषय उठाउँदै नेपालमा बाह्य शक्तिको प्रभाव बढ्दै गएको छ’ केसीले अगाडि भन्नुभयो, ‘सरकार सिआइएको रिमोटबाट चलिरहेको जस्तो देखिन्छ, यो राष्ट्रिय स्वाधीनता र जनताको हितविपरीत छ।’
केसीले विश्वभरका मजदुर वर्गले आफ्नो वास्तविक मुक्तिका लागि संगठित भएर संघर्ष गर्नुपर्ने बताउनु भयो । उहाँले आफ्नो सम्बोधनमा श्रमिक दिवसको ऐतिहासिक महत्व उल्लेख गर्दै, ‘यस दिवस केवल औपचारिक कार्यक्रमका लागि नभई श्रमिक वर्गको अधिकार, समानता र सम्मानको लागि संघर्ष गर्ने प्रतिबद्धता व्यक्त गर्ने दिन हो ।’ अध्यक्ष केसीले अगाडि भन्नुभयो, ‘संसारका मजदुरहरू अझै पनि शोषण र अन्यायको चक्रमा फसेका छन्, त्यसबाट मुक्त हुन संगठित संघर्ष अपरिहार्य छ।’
‘मजदुर, किसान र विद्यार्थी वर्गबीचको एकता नै परिवर्तनको मुख्य आधार हो ।’ केसीले अगाडि भन्नुभयो– ‘यदि यी तीन वर्ग एकजुट भए भने कुनै पनि अन्यायपूर्ण शक्ति टिक्न सक्दैन ।’
कार्यक्रममा कम्युनिष्ट संग्राहालयका अध्यक्ष चेतनानाथ आचार्य, राष्ट्रिय जनमोर्चाका केन्द्रीय सल्लाहकार बद्रे आलम, बुद्धिजीवी संघका दुर्गानाथ खरेल, उद्योग वाणीज्य संघका ढुन्डिराज शर्मा, नेकपा (मसाल)का जिल्ला प्रबक्ता लालचन्द पन्त, लिला बहादुर केसी ले मन्तव्य राख्नुभएको थियो ।
कार्यक्रमको अध्यक्षता कबिराज गिरीले, सञ्चालन हरि बहादुर केसी र स्वागत भासण हुमकान्त अधिकारीले गर्नुभएको थियो ।
