काठमाडौँ । अन्तर्राष्ट्रिय नेपाली एकता समाजले एक सय सैतिसौँ अन्तर्राष्ट्रिय मजदुर दिवस मनाएको छ ।
राष्ट्रिय जनमोर्चाका अध्यक्ष चित्रबहादुर केसीको प्रमुख आतिथ्य तथा नेकपा (मसाल) का महामन्त्री मोहनविक्रम सिंहको विशिष्ट आतिथ्यमा सो कार्यक्रम सम्पन्न भएको हो ।
२०८३ वैशाख १८ गते तदनुसार मे १, २०२६ का दिन अबेर साँझ भर्चुअल माध्यमबाट उक्त कार्यक्रम अगाडि बढेको थियो ।
नेपाल युक्रेन वा सिक्किम बन्न सक्छ, सचेत बनौँ : केसी
कार्यक्रममा मन्तव्य राख्दै राजमो अध्यक्ष केसीले देशमा प्रतिगामीसँगै साम्राज्यवादी चलखेल बढेकाले देश युक्रेन वा सिक्किम बन्न सक्ने भविष्यवाणी गर्नुभयो ।
पहिलेदेखि नै भारतले नेपालमा हस्तक्षेप, सीमा अतिक्रमण, माइक्रो म्यानेजमेन्ट गरेकोमा अहिले अमेरिकी साम्राज्यवादी हस्तक्षेप बढेर गएको बताउनुभयो ।
उहाँले भन्नुभयो– ‘अमेरिकाले गत १०–१५ वर्षदेखि देशैभरि युथ काउन्सिल खोलेरै यहाँ केही हुन्न भन्ने वातावरण तयार पार्यो ।’
यता, पुराना राजनीतिक पार्टीहरू कङ्ग्रेस, एमाले, माओवादीको बेथिती, कुशासनको जगमा जेनजी आन्दोलन उठेको उहाँको भनाइ थियो ।
अध्यक्ष केसीले एकातिर प्रतिगामी र अर्कोतिर साम्राज्यवादी खतराको विरुद्ध लड्नुपर्ने इतिहासकै गम्भीर मोडमा मुलुक आइपुगेको विश्लेषण मन्तव्यमा राख्नुभयो ।
साम्राज्यवाद कमजोर बन्दैछ : सिंह
कार्यक्रममा मन्तव्य राख्दै विशिष्ट अतिथि मसालका महामन्त्री मोहनविक्रम सिंहले साम्राज्यवाद बाहिर बलियोजस्तो देखिए पनि भित्रभित्रै कमजोर बन्दै गइरहेको दाबी गर्नुभयो ।
‘उदाहरणको रूपमा अमेरिकालाई लिन सकिन्छ’ अमेरिकाको उदाहरण प्रस्तुत गर्दै उहाँले भन्नुभयो– ‘अमेरिकी साम्राज्यवादको विरुद्धमा विश्वव्यापी असन्तुष्टि बढिरहेको छ र स्वयम् अमेरिकाभित्रै ट्रम्पको विरुद्धमा लाखौँ जनताको आवाज उठिरहेको छ ।’
जसरी पुँजीवादअन्तर्गत सुधारको मागको रूपमा मे दिवसको सङ्घर्ष उठे पनि त्यसले अन्तत: पुँजीवाद विनाशको हदसम्म विकास गर्यो, त्यसैगरी मे दिवसले साम्राज्यवादका विरुद्ध विश्वव्यापी सङ्घर्ष गर्ने प्रेरणा दिने धारणा उहाँले राख्नुभयो ।
अहिलेको विश्व कम्युनिस्ट आन्दोलन कठिन मोडमा पुगेको स्पष्ट पार्दै उहाँले अरू पक्षले आत्मसमर्पणको बाटो समाते पनि क्रान्तिकारी कम्युनिस्टले भने सङ्घर्षको बाटो अपनाएको स्पष्ट पार्नुभयो ।
उहाँले मे दिवसको इतिहासले संसारका शोषित, उत्पीडित जनतालाई क्रान्तिकारी बाटोतर्फ अघि बढ्न प्रेरणा दिएको बताउनुभयो ।
मानवजातिको दुस्मन पुँजीवाद : शर्मा
त्यस्तै मन्तव्य राख्दै राजमो केन्द्रीय सल्लाहकार तथा वामपन्थी नेता आनन्द शर्माले मानवजातिको दुस्मन पुँजीवाद भएको ठोकुवा गर्नुभयो ।
आजभन्दा एक सय सैतिस वर्षअघि नै आठ घण्टा काम, आठ घण्टा आराम र आठ घण्टा आरामको माग पूरा भइसकेको भए पनि मजदुरको अवस्था अहिले पुन: पुरानै अवस्थामा पुगेको उहाँले यस सन्दर्भमा प्रस्तुत गर्नुभयो ।
उहाँले भन्नुभयो– ‘आफैले पूरा गरेका मजदुरको अधिकार पुँजीवादले क्रमश चलाखीपूर्वक खोस्दै गइरहेको छ । उसले ठेकेदारमार्फत दायित्वबाट आफूलाई अलग गरिरहेको छ । यसरी मानवजातिकै दुस्मनको रूपमा अहिले पनि पुँजीवाद देखा परेको छ ।’
नेपालमा दुईतिहाइको नयाँ सरकार सत्तामा आए पनि मजदुरका अधिकार खोस्ने काम अन्तत: पुँजीपतिको पक्षमा रहेको उहाँको विश्लेषण थियो ।
सङ्घर्ष नै एक मात्र विकल्प रहेको स्पष्ट पार्दै उहाँले मे दिवसको अवसरमा यसका लागि तयार रहन सबै गम्भीर हुनुपर्ने बताउनुभयो ।
कार्यक्रममा अखिल नेपाल महिला सङ्घकी अध्यक्ष मीना पुन, अखिल नेपाल युवक सङ्घका अध्यक्ष गणेश अधिकारी, मूल प्रवाह अखिल भारत नेपाली एकता समाजका उपाध्यक्ष कपिल खनाल, अखिल नेपाल ट्रेड युनियन महासङ्घ (अन्टुक) का महासचिव धनपति सापकोटा र प्रगतिशील पत्रकार सङ्घका महासचिव प्रकाश थापामगरले मन्तव्य राख्नुभएको थियो
त्यस्तै अखिल नेपाल प्रगतिशील लेखक सङ्घ (अन्पा) का अध्यक्ष समीर सिंहले ‘मेरो पहिचान’ शीर्षकको कवितामार्फत कार्यक्रमलाई शुभकामना दिनुभएको थियो ।
अध्यक्ष शक्तमान बुढाथोकीको अध्यक्षता तथा महासचिव खुम रायमाझीको सञ्चालनमा अघि बढेको उक्त कार्यक्रममा केन्द्रीय सदस्य रामप्रसाद पराजुलीले शब्दद्वारा र रक्तिम कतारका कलाकारद्वारा गीतसङ्गीतद्वारा स्वागत गरिएको थियो ।
कार्यक्रममा स्वदेश तथा विदेशमा मसालनिकटका जनवर्गीय सङ्गठनका नेताकार्यकर्ताको उल्लेख्य सहभागिता रहेको थियो ।
