काठमाडौँ । अध्यादेशमार्फत ऐन बनाउन खोज्ने सरकारको कदम असंवैधानिक र असंसदीय भएको टिप्पणी नेकपा (एमाले) संसदीय दलका नेता रामबहादुर थापा ‘बादल’ ले गरेका छन् ।
‘संविधानले संसद् नबसेको अवस्थामा अध्यादेश सिफारिस गर्नसक्ने व्यवस्था भए पनि अहिलेको परिस्थिति त्यसभन्दा भिन्न रहेको छ ।’ । विपक्षी दलको बैठकपछि सञ्चारकर्मीहरूसँग कुराकानी गर्दै थापाले भने, ‘यो त त्योभन्दा भिन्न मात्र होइन, उल्टो छ । सदनलाई स्थगित गरेर अध्यादेश जारी गरिएको छ ।’
‘सरकारले ऐन कानून बनाउने होइन । सरकारले त ती ऐन र कानूनहरूको कार्यान्वयन गर्ने हो ।’ थापाले भने– ‘त्यसकारण सरकारले जुन काम गरिरहेको छ यो व्यवस्थापिकाको अधिकार क्षेत्रको अतिक्रमण गरेर जसरी ऐन बनाउन खोज्दै छ यो अलोकतान्त्रिक, असंवैधानिक र असंसदीय छ ।’ आह्वान गरिसकेको संसद् स्थगित गरेर अध्यादेश जारी गर्नु अलोकतान्त्रिक, असंवैधानिक र असंसदीय कदम भएको थापाको थप भनाइ थियो ।
