काठमाडौँ । राष्ट्रिय जनमोर्चाका केन्द्रीय सल्लाहकार तथा वामपन्थी नेता आनन्द शर्माले एमाले माओवादीलाई हेरेर नेपालको कम्युनिस्ट आन्दोलनको मूल्याङ्कन गर्न नहुने बताउनुभएको छ ।
नेकपा (मसाल) केन्द्रीय कार्यालयद्वारा २०८३ वैशाख ९ गते तदनुसार अप्रिल २२, २०२६ का दिन आयोजित नेकपाको अठहत्तरौँ स्थापना दिवस तथा लेनिनको एक सय सन्ताउन्नौँ जन्मजयन्ती समारोहलाई सम्बोधन गर्दै उहाँले सो धारणा व्यक्त गर्नुभएको हो ।
राजमो केन्द्रीय कार्यालयको सभाकक्षमा आयोजित सो कार्यक्रममा नेता शर्माले भन्नुभयो– ‘एमाले माओवादीलाई हेरेर कम्युनिस्ट आन्दोलन पहिले बलियो थियो, अहिले कमजोर भयो भन्ने व्याख्या वा भाष्य गलत छ ।’
एमाले र तत्कालीन माओवादी वा हालको नेकपा वास्तविक कम्युनिस्ट पार्टी नरहेको दाबी गर्दै उहाँले यस प्रकारको विचारलाई अपव्याख्याको संज्ञा दिनुभयो ।
नेपालको हकमा मसालले मात्रै क्रान्तिकारी कम्युनिस्ट सिद्धान्तलाई आत्मसात गरिरहेको दाबी उहाँको थियो ।
‘नेपालमा कम्युनिस्ट सिद्धान्तलाई दह्रो गरी पक्रिने मसाल मात्रै हो’ उहाँले भन्नुभयो– ‘नेकपा (मसाल) लगातार क्रान्तिकारी दिशामा अगाडि बढ्ने कोसिस गरिरहेको छ ।’
उहाँले विरोधीले गरेको प्रचारबाट विचलित नहुन आफ्ना कार्यकर्ताहरूलाई आह्वान गर्नुभयो ।
नेता शर्माले भन्नुभयो– ‘नेपालको तात्कालिक राजनीतिमा साम्राज्यवादी र प्रतिक्रियावादी गरी दुईओटा तरबारका विरुद्ध सङ्घर्ष गर्ने जिम्मेवारी मसाल र राजमोको हो ।’
उहाँले आफूलाई मसाल र राजमोको कार्यकर्ता भएकोमा गर्व गर्न अनुरोध गर्नुभयो ।
नेपालको कम्युनिस्ट आन्दोलनमा झापा आन्दोलन र माओवादी सशस्त्र द्वन्द्वको रूपमा भड्काव आएको स्पष्ट पार्दै उहाँले अहिले वैचारिक रूपमा उनीहरू कहाँ पुगे भनेर खोज्नुपर्ने अवस्था आएको बताउनुभयो ।
उहाँले भन्नुभयो– ‘झापा आन्दोलन र २०५२ सालदेखि चलेको माओवादी सशस्त्र द्वन्द्वका सञ्चालनकर्ताहरू अहिले दक्षिणपन्थी अवसरवादमा पतन भइसकेका छन् ।’
ठोस परिस्थितिको ठोस विश्लेषण माक्र्सवाद–लेनिनवादको आत्मा भएको बताउँदै उहाँले मसालले मात्रै त्यो आत्मालाई पक्रेको दाबी गर्नुभयो ।
माक्र्स र एङ्गेल्सले सिद्धान्तमा बढी जोड दिएको तर लेनिनले भने सङ्गठनमा समेत जोड दिएकाले उनीमाथि बढी आक्रमण भएको सन्दर्भ उहाँले मन्तव्यको क्रममा जोड्नुभयो ।
‘लेनिनले सर्वहारा वर्गसित सङ्गठनभन्दा बलियो अर्को हतियार नभएको बताएर त्यसलाई सञ्चालन गर्ने जनवादी केन्द्रीयताजस्तो मौलिक सिद्धान्तको आविष्कार गर्नुभयो’ उहाँले भन्नुभयो– ‘लेनिनले सङ्गठनात्मक यस्तो सिद्धान्त अगाडि सारेपछि प्रतिक्रियावादीको तारो बन्नुभयो । त्यत्ति मात्रै होइन, कम्युनिस्ट खेमाभित्रका अवसरवादीको पनि तारो बन्नुभयो ।’
कार्यक्रमको प्रारम्भमा मसालका महामन्त्री मोहनविक्रम सिंहद्वारा जारी गरिएको प्रेसवक्तव्य वाचन गरिएको थियो ।
मसालका केन्द्रीय प्रवक्ता रामप्रकाश पुरीको अध्यक्षतामा अघि बढेको उक्त कार्यक्रममा राजमो महासचिव मनोज भट्ट, अखिल नेपाल महिला सङ्घकी अध्यक्ष मीना पुन, अखिल नेपाल जनजाति सम्मेलनका अध्यक्ष निमबहादुर बुढाथोकी, रक्तिम सांस्कृतिक अभियानका अध्यक्ष गिरीप्रसाद बुढा, अखिल (छैठौं) का अध्यक्ष सुवास जिसी, अखिल नेपाल ट्रेड युनियन महासङ्घ (अन्टुक) का महासचिव धनपति सापकोटा, प्रगतिशील पत्रकार सङ्घका महासचिव प्रकाश थापामगर, अखिल नेपाल बुद्धिजीवी सङ्घका कोषाध्यक्ष भोला ढकाल, अखिल नेपाल किसान महासङ्घ (अप्फा) का कोषाध्यक्ष केबी घले र अखिल नेपाल युवक सङ्घका केन्द्रीय सदस्य सगर सुवेदीले पनि मन्तव्य राख्नुभएको थियो ।
मसालकै ३ नम्बर ब्युरो प्रवक्ता समीर सिंहको सञ्चालन रहेको सो कार्यक्रमको सञ्चालन काठमाडौँ प्रवक्ता जगतप्रसाद रेग्मीले गर्नुभएको थियो ।
