दाङ, चैत ९ । राष्ट्रिय जनमोर्चा दाङ जिल्ला समितिको आयोजनामा १५७ औं लेनिन जयन्ती तथा नेपाल कम्युनिस्ट पार्टीको ५८औँ स्थापना दिवस मनाइएको छ ।

राष्ट्रिय जनमोर्चा दाङका सचिव बसन्त पौडेलको अध्यक्षता तथा मनिराम खनालको सञ्चालनमा कार्यक्रममा अगाडि बढेको थियो । कार्यक्रममा सहभागिहरूलाई राजमो जिल्ला सहसचिव कृष्ण रानाले स्वागत गर्नुभएको थियो ।

लेनिनवादको औचित्य महत्व र सान्दर्भिकताको बारेमा अखिल नेपाल युवक संघका पूर्व अध्यक्ष काशीनाथ पोखरेलले धारणा राख्नुभएको थियो ।

राष्ट्रिय जनमोर्चा केन्द्रीय सदस्य तथा दाङ जिल्ला अध्यक्ष गणेश आचार्यले प्रमुख अतिथिको आसनबाट मन्तव्य राख्नुभएका थियो । लेनिन र लेनिनवादको महत्व सान्दर्भिकता आजपनि रहेको बताउनु भयो । ‘लेनिनका दार्शनिक विचारहरूलाई लेनिनले प्रतिपादन गरेको संगठनात्मक प्राणीलाई अपनाउँदै समाजमा रहेका मजदुर किसान र शोषित पीडित वर्गको मुक्तिको लागि अनुसरण गर्नुपर्ने आवश्यकता छ ।’ आचार्यले अगाडि भन्नुभयो ।

नेपाल कम्युनिस्ट पार्टीको ७८औँ स्थापना दिवस मनाइरहँदा नेपालमा दक्षिणपन्थी अवसरवाद हावी भएको आचार्यले बताउनु भयो । नेपालको कम्युनिष्ट आन्दोलन रक्षात्मक अवस्थामा पुगेको र यसलाई जीवित राख्दै अगाडि लैजाने काम नेपाल कम्युनिस्ट पार्टी (मसाल)ले मात्र गरिरहेको बताउनुभयो ।

कार्यक्रममा अखिल नेपाल किसान महासंघका दाङ जिल्ला अध्यक्ष ऋषिराम पौडेल, जातीय समता समाज दाङका अध्यक्ष सूर्यलाल नेपाली, प्रगतिशील पत्रकार संघका केन्द्रीय सदस्य ईश्वरी भण्डारी, अखिल नेपाल प्रगतिशील लेखक संघ लुम्बिनी प्रदेशका उपाध्यक्ष सुरेश कुमार पाण्डे, अखिल नेपाल महिला संघ दाङ जिल्ला सदस्य हेमा पोख्रेल, जनप्रतिनिधिहरू दिनामणि आचार्य, विष्णु भुसाल, भौतिकवादी समाज दाङका संयोजक पदम पोखरेल, रक्तिम सांस्कृतिक अभियान घोराहीनगरका अध्यक्ष उत्सव पुनले मन्तव्य राख्नुभएको थियो ।