काठमाडौँ । राष्ट्रिय जनमोर्चाले संविधान संशोधन गर्दैगर्दा संविधान संशोधन गर्दैगर्दा संघीयता खारेज गर्न र राष्ट्रिय जनावर गैंडा बनाउन जोड दिएको छ । राजमोले संविधान संशोधनको सम्बन्धमा आफ्नो लिखित धारणा सार्वजनिक गर्दै संघीयता खारेज गरी विकेन्द्रीकरणसहितको एकात्मक व्यवस्था लागू गर्नुपर्ने प्रस्ताव गरेको छ ।
पार्टीका अध्यक्ष चित्रबहादुर केसीको हस्ताक्षरसहितको उक्त संशोधन प्रस्तावमा राज्यको पुनर्संरचनादेखि राष्ट्रिय पहिचानका विषयहरूमा समेत व्यापक हेरफेरको लागि जोड दिइएको छ ।
राष्ट्रिय जनमोर्चाले बुझाएको प्रस्तावमा संघीय प्रणालीले जातीय र क्षेत्रीय सद्भाव बिगार्ने तथा देशको आर्थिक भारले धान्न नसक्ने जोड दिएको छ । त्यसैले प्रदेश संरचना खारेज गरी केन्द्र र स्थानीय तह मात्र भएको दुई तहको राज्य संरचना बनाउनुपर्ने प्रस्ताव सो पार्टीले गरेको छ । पार्टीले यो धारणा २०६३ को अन्तरिम संविधानमा संघीयता प्रस्तावित भएसँगै निरन्तर रुपमा हालसम्म उठाउँदै आइरहेको छ ।
यस्तै, राष्ट्रिय जनमोर्चाले नेपालको राष्ट्रिय जनावर गाई परिवर्तन गरी गैंडा राख्न प्रस्ताव गरेको छ । गाई एउटा धर्म विशेषको प्रतीक भएकाले यसले धर्मनिरपेक्षताको सिद्धान्त उल्लङ्घन गर्ने जिकिर प्रस्तावमा गरिएको छ ।
नागरिकताका सम्बन्धमा जनमोर्चाले वंशजको आधारलाई मुख्य प्राथमिकता दिनुपर्ने र हचुवाको भरमा गैरनेपालीले नागरिकता पाउने छिद्रहरू बन्द गर्नुपर्नेमा जोड दिएको छ । नेपाली नागरिकसँग विवाह गर्ने विदेशी महिलालाई ७ वर्षपछि मात्र अंगीकृत नागरिकता दिने व्यवस्था गर्नुपर्ने राष्ट्रिय जनमोर्चाले प्रस्ताव गरेको छ ।
प्रस्तावमा प्रवासी नेपालीहरूलाई मताधिकारको व्यवस्था गर्नुपर्ने, ज्येष्ठ नागरिकको सम्पूर्ण उपचार खर्च राज्यले व्यहोर्नुपर्ने र आधारभूत स्वास्थ्य सेवा पूर्ण निःशुल्क हुनुपर्ने उल्लेख छ । साथै, दलित र महिला समुदायका लागि प्रत्यक्ष निर्वाचनतर्फ नै विशेष आरक्षित निर्वाचन क्षेत्रको व्यवस्था गर्नुपर्ने प्रस्ताव समेत राष्ट्रिय जनमोर्चाद्वारा प्रस्ताव गरिएको छ।
गणतन्त्र, धर्मनिरपेक्षता, समावेशिता र बहुदलीय प्रतिस्पर्धा जस्ता विषयहरूमा भने कुनै पनि हालतमा जनमत संग्रह गर्न नपाइने गरी संविधानमै व्यवस्था गर्नुपर्ने राष्ट्रिय जनमोर्चाको अडान छ ।
