काठमाडौँ । नेपालमा अमेरिका पछि चीनले पनि ‘युथ काउन्सिल’ ल्याएको छ । चिनियाँ दूतावासले अप्रेल १७ तारिकको एक सुचना जारी गरी नेपालका जेनजी युवाहरुलाई लक्षित गरी युवा अग्रणी कार्यक्रम सञ्चालन गर्ने बताएको छ ।
‘चाइनिज एम्बेसी युथ पायोनियर प्रोग्राम (सी.एन.वाई.पी)’ भनिने यस कार्यक्रमको उद्देश्य नेतृत्व विकास, सामाजिक तथा आर्थिक रूपान्तरणमा युवाको भूमिका विस्तार र चीन–नेपालबीच आपसी समझदारी तथा सहकार्य सुदृढ गर्ने सुचनामा उल्लेख छ ।
काठमाडौंस्थित चिनियाँ दूतावासले जारी गरेको सुचना अनुसार यस कार्यक्रममार्फत सहभागीहरूलाई नेतृत्व तालिम, नीति तथा सामाजिक मुद्दामा छलफल, कार्यशाला तथा अध्ययन भ्रमणमा सहभागी गराइनेछ । साथै छनोट भएका युवालाई चीन भ्रमणको अवसर पनि प्रदान गरिने उल्लेख छ।
दूतावासले यो कार्यक्रमले नेपालमा ‘रूपान्तरणकारी सोच’ भएका युवाको सञ्जाल निर्माण गर्ने लक्ष्य राखेको जनाएको छ । सहभागीहरूले विभिन्न क्षेत्रका विज्ञ, कूटनीतिज्ञ र उद्यमीसँग अन्तरक्रिया गर्ने अवसर पाउनेछन् ।
अमेरिकाले पनि नेपाली युवा लक्षित कार्यक्रम गर्ने बहानामा ‘अमेरिकी युथ काउन्सिल’ सञ्चालन गर्दै आएको छ । विश्लेषकहरूका अनुसार चीन र ‘अमेरिकाजस्ता ठूला शक्ति राष्ट्रहरूले सञ्चालन गर्ने यस्ता कार्यक्रमहरू केवल शैक्षिक वा नेतृत्व विकासमा सीमित नभई ‘सफ्ट पावर कूटनीति’ का महत्वपूर्ण हिस्सा हुन् ।
नेपालजस्ता देशमा यस्ता कार्यक्रमहरूले युवाबीच अन्तर्राष्ट्रिय नेटवर्क विस्तार, अनुभव आदान–प्रदान र नीति–सम्बन्धी क्षमता विकासमा योगदान पुर्याउने भए पनि यसको दीर्घकालीन कूटनीतिक प्रभावबारे बहस पनि विभिन्न कोणबाट हुँदै आएको छ । भदौ २३–२४ को जेनजी आन्दोलनको पछि ‘अमेरिकी युथ काउन्सिल’ को गतिविधि संकास्पद रहेको धेरै बुद्धिजिवीहरूको रहँदै आएको छ । नेपालमा अमेरिकी युथ काउन्सिले भूराजनीतिमा समेत सिधै प्रभाव परेको अधिकांश राजनीतिज्ञहरूको धारणा रहँदै आएको छ ।
सी.एन.वाई.पी. कार्यक्रमसँगै अमेरिकी नेतृत्व विकास कार्यक्रमहरूको तुलना गर्दा दुबै देशले नेपालका युवा जनशक्तिमा पहुँच विस्तार गर्न प्रतिस्पर्धात्मक रूपमा एक्सचेन्ज कार्यक्रमहरू सञ्चालन गर्दै आएको पनि देखिन्छ ।
