तौलिहवा । कपिलवस्तु शिवराज नगरपालिका चन्द्रौटामा अखिल नेपाल जनजाति सम्मेलन र जातीय समता समाजले संयुक्त रूपमा चालिसौँ स्थापना दिवस मनाएका छन् ।
जनजाति सम्मेलनका केन्द्रीय सदस्य केहरसिंह पुनमगरको प्रमुख आतिथ्यमा २०८३ वैशाख ३ गते सो कार्यक्रम सम्पन्न भएको हो ।
कार्यक्रममा सम्बोधन गर्दै प्रमुख अतिथि पुनमगरले जनजातिको हकअधिकार, आरक्षण केही मात्रामा कानुनमा उपलब्धि भए पनि व्यवहारमा पूर्ण रूपमा लागु नभएको बताउनुभयो ।
सम्मेलनले जनजातिको हकअधिकारको सुनिश्चिताका लागि सङ्घर्ष गर्दै आएको बताउनुभयो ।
जातीय समता समाजका केन्द्रीय सल्लाहकार तथा भूपू केन्द्रीय अध्यक्ष दिलबहादुर विकले जातीय समता समाजका स्थापना र दलित आन्दोलनको इतिहासबारेमा प्रकाश पार्दै दलितको चेतना स्तर उठाउन समता समाजले महत्त्वपूर्ण भूमिका खेल्दै आएको बताउनुभयो ।
राष्ट्रिय जनमोर्चा कपिलवस्तुका सचिव केरसिंह अदैले भेलालाई सम्बोधन गर्दै जनजाति सम्मेलन र जातीय समता समाजले नेपालका प्रजातान्त्रिक आन्दोलनमा महत्त्वपूर्ण भूमिका खेल्दै आएको बताउनुभयो ।
उहाँले जातीय मुक्ति, वर्गीय सङ्घर्षबाट मात्र समाधान हुने बताउनुभयो ।
कार्यक्रममा अखिल नेपाल महिला सङ्घकी चनकिया चौधरीले पनि मन्तव्य राख्नुभएको थियो ।
जनजाति सम्मेलनका जिल्ला अध्यक्ष नरबहादुर घर्तीमगरको अध्यक्षता तथा सम्मेलनकै शिवराज नगर समितिका अध्यक्ष शिवप्रसाद थारूको सञ्चालन र समता समाज कपिलवस्तुका अध्यक्ष रामबहादुर विकले गर्नुभएको थियो ।
