टेकराज भुसाल, रुपन्देही ।
अखिल नेपाल ट्रेड युनियन महासंघ (अन्टुक) का कार्यबहाक अध्यक्ष लोकराज भुसालकी ममतामयी आमा स्वर्गीय टुमकला भुसालको १६ औं मासिक स्मृति दिवसको अवसरमा असहायहरुलाई खाना तथा लत्ताकपडा वितरण गरिएको छ ।
स्वर्गीय भुसालको सम्झनामा परिवारको तर्फबाट स्थापना गरिएको ‘स्व. चुरामणी–टुमकला भुसाल स्मृति अक्ष्यकोष’ बाट अनाथ र असहायलाई खाना खुवाउने तथा कपडा वितरण गरिएको हो ।
रुपन्देहीको सैनामैना नगरपालिकामा अवस्थित श्री सैनामैना माविमा रहेको अक्ष्यकोषको तर्फबाट अक्षयकोषका संरक्षक तथा स्वर्गीय भुसालका जेठा छोरा लोकराज भूसालले बुटबलमा रहेको मानवसेवा आश्रममा आवासीय रुपमा बसेका १३६ जना अनाथ, असहाय महिला, पुरुष तथा बालबालिकाहरुलाई खाना खुवाउनुका साथै गर्मीमा लगाउन उपयुक्त एक एक जोर सुतिको कपडा वितरण गर्नुभयो ।
त्यस अवसरमा आमाप्रति श्रद्धाञ्जली प्रकट गर्दै भुसालले आमाले सिकाउनुभएका प्रेरणादायक बाटाहरु र असल विचार एवम् व्यबहारको सधैँ अनुसरण गर्ने प्रतिबद्धता गर्दै यस प्रकारको कार्यमा प्रत्यक्ष तथा अप्रत्यक्ष रुपमा सहयोग पुर्याउने सबैप्रति आभार प्रकट गर्नु भएको थियो ।
कार्यक्रममा स्वर्गीय भुसालका आफन्त तथा स्थानीयको उपस्थिति रहेको थियो ।
