प्रकाश थापामगर/गोविन्द शर्मा, काठमाडौँ ।
बुढानीलकण्ठ नगर अस्पतालले आफ्नो दोस्रो वार्षिकोत्सव मनाएको छ ।
बागमती प्रदेश सरकारका स्वास्थ्यमन्त्री किरण थापामगरको प्रमुख आतिथ्यमा २०८२ चैत ३० गते सोमबार सो कार्यक्रम सम्पन्न भएको हो ।
नगरप्रमुख तथा अस्पताल सञ्चालन समितिका अध्यक्ष मिठाराम अधिकारीको अध्यक्षतामा अघि बढेको उक्त कार्यक्रममा सङ्क्षिप्त मन्तव्य राख्दै प्रमुख अतिथि थापामगरले यस आर्थिक वर्षमा सरकारले स्वास्थ्यलाई प्राथमिकतामा राखेको बताउनुभयो ।
आधारभूत स्वास्थ्यसेवा दिने अस्पतालले आमजनतालाई प्रभावित गर्ने बताउँदै उहाँले नगर अस्पताल पनि सोही श्रेणीमा परेको बताउनुभयो ।
उहाँले क्रमश: नगर अस्पतालले आफ्ना सेवा वृद्धि गर्दै जानुपर्ने आवश्यकतामा जोड दिनुभयो ।
कार्यक्रममा वरिष्ठ मुटुरोग डा. भगवान कोइरालाले नगर अस्पतालको मातहतमा नगरभित्रका अन्य प्राथमिक स्वास्थ्य सेवालाई समेट्न सुझाव दिनुभयो ।
वीर अस्पतालका कार्यकारी निर्देशक डा. भूपेन्द्र बस्नेतले नगर अस्पताल सबल बन्दा सङ्घीय अस्पतालको चाप कम हुने धारणा राख्नुनभयो ।
मदन भण्डारी स्वास्थ्य विज्ञान प्रतिष्ठानका उपकुलपति डा. प्रदीप ज्ञवालीले स्वास्थ्योपचारलाई प्राथमिक मानवीय आवश्यकताको रूपमा लिनुपर्ने बताउनुभयो ।
नगर उपप्रमुख अनिता लामाले बुढानीलकण्ठ नगर अस्पतालले गत दुई वर्षमा राम्रो प्रगति गरेको बताउनुभयो ।
पूर्व नगरप्रमुख उद्धव खरेलले नगर अस्पतालले सेवाग्राहीको विश्वास जित्नुपर्ने आवश्यकतामा जोड दिनुभयो ।
कार्यक्रममा अध्यक्ष अधिकारीले पालिकाले वडा नं. ४ र ७ मा स्वास्थ्य सर्वेक्षण सम्पन्न गरिसकेको जानकारी दिँदै अन्य वडामा पनि सर्वेक्षण अगाडि बढाइने बताउनुभयो ।
अस्पतालका कार्यकारी निर्देशक डा सुधांशु झाको स्वागत मन्तव्यसँगै अघि बढेको उक्त कार्यक्रममा लेखा शाखाका प्रमुख मीनराज खड्काले सञ्चालन गर्नुभएको थियो ।
अस्पतालको प्रगति विवरण प्रमुख प्रशासकीय अधिकृत गोपालप्रसाद पोखरेलले प्र्रस्तुत गर्नुभएको थियो ।
कार्यक्रममा अस्पतालकै कर्मचारी राधिका ढकालले स्वागत गीत गाउनुभएको थियो ।
कार्यक्रमको अन्ततिर प्रमुख अतिथि र अन्य अतिथिलाई मायाको चिनो प्रदान गरिएको थियो ।
सो अवसरमा नगरप्रवक्ता तथा १० नं. वडाका अध्यक्ष नवराज भट्टराईसँगै विभिन्न वडाका अध्यक्ष, वडासदस्य, विभिन्न स्वास्थ्य संस्थाका प्रतिनिधि, अस्पतालका स्वास्थ्यकर्मी, कर्मचारी तथा सेवाग्राहीसमेतको उपस्थिति रहेको थियो ।
नगर अस्पतालले गत २०८२ वैशाख १ गतेदेखि सेवा सुरु गरेकोमा आज दोस्रो वार्षिकोत्सव मनाएको हो ।
अस्पतालका अनुसार दैनिक तीन जना सेवाग्राहीबाट स्वास्थ्य सेवा सुरु भएकोमा सो सङ्ख्या अहिले दैनिक तीन सय बढी पुगेको छ ।
अस्पतालमा अहिले ७३ जना कर्मचारी छन् । सेवाग्राहीमध्ये ९५ प्रतिशत स्वास्थ्यबिमाका रहेको पनि बताइएको छ ।
