दाङ । राष्ट्रिय जनमोर्चा लुम्बिनी प्रदेश समितिका सल्लाहकार सुरेश थापाले गत फागुन २१ गते साम्राज्यवादले आफ्नो इन्ट्रेस्टमा चुनाव गराएको र त्यसमा सफलता पनि पाएको दाबी गर्नुभएको छ ।

राजमो दाङ क्षेत्र नम्बर २ ले २०८२ चैत २७ गते शनिबार घोराहीमा आयोजना गरेको चुनावी समीक्षा तथा प्रशिक्षण कार्यक्रममा मन्तव्य राख्दै उहाँले सो अभिव्यक्ति दिनुभएको हो ।

‘२०८२ साल फागुन २१ गतेको चुनाव विशेष परिस्थितिमा अमेरिकी साम्राज्यवादको इन्ट्रेस्टमा भएको थियो’ उहाँले भन्नुभयो– ‘चुनावको मतपरिणाम पनि अमेरिकी साम्राज्यवादकै पक्षमा आएको छ बरु आज हाम्रो देशले नै हारेको स्थिति सिर्जना भएको छ ।’

राजमोले आफ्ना साम्राज्यवाद विरोधी चुनावी एजेन्डा बोकेर जनताका बिचमा गएको तर कथित पुराना पार्टीहरूप्रति जनतामा आएको वितृष्णाको लपेटामा आफ्नो सङ्गठन पनि परेको उहाँको भनाइ थियो ।

उहाँले भन्नुभयो– ‘पुराना सबै गलत हुन् भन्ने भ्रम र भाष्य जनतामाझ स्थापना गरियो । त्यसको प्रभावमा हामी पनि पर्‍यौँ ।’

मन्तव्यको क्रममा उहाँले आफ्नो लक्ष्यप्राप्तिका लागि चुनावमा सिआइएको अहम भूमिका रहेको उहाँको विश्लेषण थियो ।

‘पुरानाको विरुद्धमा नयाँको पक्षमा भन्ने भाष्य निर्माण गरियो । फलस्वरूप देशमा अमेरिकी साम्राज्यवादको कठपुतली सरकार निर्माण हुन पुग्यो’ उहाँले जिकिर गर्नुभयो ।

आफ्ना कार्यकर्तालाई चुनावको परिणामबाट निराश नहुन आग्रह गर्दै उहाँले आफ्नो पार्टी वैचारिक रूपले प्रस्ट हुँदै अगाडि बढ्ने बताउनुभयो ।

उहाँले भन्नुभयो– ‘अब हामी जनताका बिचमा यो राष्ट्र बचाउनका लागि योजनाबद्ध तरिकाले नीति र विचार बोकेर लाग्नेछौँ ।’

कार्यक्रममा राजमो केन्द्रीय सदस्य तथा दाङ जिल्ला अध्यक्ष गणेश आचार्य, अखिल नेपाल युवक सङ्घका पूर्व केन्द्रीय अध्यक्ष काशीनाथ पोखरेल, अखिल (छैठौँ) का केन्द्रीय सदस्य तथा दाङका अध्यक्ष सेवक भट्टराई, अखिल नेपाल प्रगतिशील लेखक सङ्घ लुम्बिनी प्रदेश समितिका उपाध्यक्ष सुरेशकुमार पाण्डे, राजमो दाङका सहसचिव कृष्णा राना र राजमो जिल्ला समितिका सदस्य मेघराज भट्टराईले मन्तव्य राख्नुभएको थियो ।

त्यस्तै राजमो घोराही नगर समितिका अध्यक्ष मनिराम खनाल, अखिल नेपाल किसान महासङ्घ (अप्फा) का पूर्व दाङ जिल्ला अध्यक्ष मिनुप्रसाद सुवेदी, जातीय समता समाज दाङका जिल्ला अध्यक्ष सूर्यलाल नेपाली, अखिल नेपाल ट्रेड युनियन महासङ्घ (अन्टुक) दाङका सचिव कमल पन्थी, अखिल नेपाल जनजाति सम्मेलन दाङका सचिव मङ्गल घर्ती, सम्मेलनकै जिल्ला समितिका सदस्य भौना चौधरी, अखिल नेपाल महिला सङ्घ दाङकी सदस्य तथा घोराही नगर अध्यक्ष हेमा पोखरेललगायतले पनि चुनावमा राजमोले खेलेको भूमिका र अनुभव प्रस्तुत गर्नुभएको थियो ।

चुनाव परिचालन समितिका संयोजक रामबहादुर जिएमको अध्यक्षतामा अघि बढेको उक्त कार्यक्रममा स्वागत मन्तव्य नगर उपाध्यक्ष चन्द्रबहादुर राउतले तथा सहजीकरण नगर सचिव बलदेव विकले गर्नुभएको थियोे ।