काठमाडौं । राष्ट्रिय विपद् जोखिम न्युनीकरण तथा व्यवस्थापन प्राधिकरणले वर्षा र बाढीबारे पूर्वजानकारी तथा सहयोग चाहिएमा पैसा नलाग्ने फोन नम्बर सार्वजनिक गरेको छ ।

प्राधिकरणले वर्षा तथा बाढीबारे पूर्वजानकारी लिन तथा बाढीपहिरोबाट पीडित भई कुनै सहयोग चाहिए सरकारले आम नागरिकका लागि निःशुल्क फोन गर्न सकिने नम्बर उपलब्ध गराएको हो ।

प्राधिकरणका अनुसार वर्षा तथा बाढीको सम्भावनाबारे जानकारी लिनुपरे ११५५ र कुनै सहयोग चाहिए ११४९ नम्बर फोन गर्न सकिन्छ ।

वर्षा र बाढीबारे थाहा पाउन ११५५ र उद्धारका लागि मद्दत माग्न ११४९ । बाँकी दलेदाइबाट… । @DHM_FloodEWS @DHM_Weather @NEOCOfficial pic.twitter.com/jmvvKjZqcc

— NDRRMA (@NDRRMA_Nepal) July 23, 2020

गण्डकीमा अझै वर्षाको सम्भावना
प्राधिकरणका अनुसार मनसुनी न्युन चापीय रेखा नेपालको पश्चिम भागबाट दक्षिणतिर सरेकाले प्रदेश ५, कर्णाली प्रदेश र सुदूरपश्चिमका जिल्लाहरुमा केही दिनसम्म ठूलो वर्षा र लगातारको झरी नहुने मौसमविदले बताएका छन् । गण्डकी प्रदेशदेखि पूर्वी भूभागमा भने अझै पनि भारी वर्षाको सम्भावना कायमै छ ।

मनसुनी न्युन चापीय रेखा जुन भूभागको माथि पर्छ, त्यहाँ भारी वर्षा हुने मौसमविद बताउँछन् । साउन ४ गतेदेखि नेपालको ठीक माथि मनसुनी न्युन चापीय रेखा पर्दा केही दिन देशभर लगातार भारी वर्षा भएको थियो । निम्न चापीय रेखा हाल पश्चिमी भुभागबाट दक्षिणतर्फ सर्दै गए पनि नेपालको पूर्वी भूभागको नजिक कायमै छ ।

त्यसैले, गण्डकी प्रदेशदेखि पूर्वी नेपालका भूभागहरुमा भने अझै केही दिन भारी वर्षाको सम्भावना कायमै छ । प्रदेश ५ का एक–दुई स्थानमा पनि भारी वर्षाको सम्भावना रहेको जल तथा मौसम विज्ञान विभागले जारी गरेको नियमित बुलेटिनमा उल्लेख छ ।

केन्द्रले उक्त स्थानका साना नदीमा आकस्मिक बाढी आउन सक्ने पूर्वानुमान गरिएकाले सतर्क रहन आग्रह गरेको छ । यसैगरी आगामी तीन दिनसम्म नारायणी र यसका सहायक नदीहरुमा बहाव केही बढ्ने पूर्वानुमान पनि गरिएको छ ।