बुटवल, चैत ७ गते । नेपाल कम्युनिष्ट पार्टी (मसाल)का महामन्त्री मोहनविक्रम सिंहले गत फागुन २१ गते सम्पन्न चुनावको जनमत अमेरिकी डिजाइन र योजनामा आएको बताउनु भएको छ । जनताले अमेरिकी साम्राज्यवादको खेल बुझ्न नसक्दा दलहरूले हार व्योहोर्नु परेको बताउँदै अमेरिकी डिजाइन जनताले बुझ्न नसक्दा यस्तो परिणाम आएको महामन्त्री सिंहको भनाई थियो ।

नेकपा (मसाल) केन्द्रीय कार्यालयले २०८२ चैत्र ८ गते बुटवलमा आयोजना गरेको पत्रकार भेटघाट कार्यक्रममा बोल्दै महामन्त्री सिंहले वर्तमान राजनीतक अवस्थाले देशलाई गम्भीर मोडमा पुराएको उल्लेख गर्दै– ‘चुनावको परिणाम राजनीतिक इतिहासकै सबै भन्दा गम्भीर र अवान्छित परिणाम हो ।’

बरिष्ठ कम्युनिष्ट नेता सिंहले अहिलेको चुनावको परिणामलाई जनमत भन्न नमिल्ने तर्क गर्दै प्रतिनिधि सभा निर्वाचन नेपालको आवश्यक्ता अनुसार नभएर अमेरिकी रणनीति अनुसार भएको दावी गर्नुभयो । उहाँले अब बन्ने नयाँ सरकार पनि अमेरिकाको डिजाइनमा बन्ने दावी गर्दै– ‘संसद विघटनदेखि निर्वाचन सम्पन्न गर्दासम्मको सबै प्रकृयाहरू योजनाबद्ध रुपमा भएको छ।’

महामन्त्री सिंहले चैत २३ र २४ गते देशभर भएको आन्दोलनलाई मूलतः भ्रष्टाचार, सामाजिक अन्याय र विसंगतिविरुद्धको जनअसन्तोषको अभिव्यक्ति भएको बताउँदै युवाहरूको स्वतःस्फूर्त सहभागिता रहेको जेनजी आन्दोलनलाई गैरजेनजी तत्वहरूले “हाइज्याक” गरेर अमेरिकी साम्राज्यवादको सेवामा प्रयोग गरिएको आरोप लगाउनु भयो ।

जेनजी पुस्ताले उठाएका मागहरू ठिक भएपनि सही प्रकारको नेतृत्व नहुँदा र राजनीतिक विचारबिहिन आन्दोलन भएकाले अरुले फाइदा लिएर विध्वंस मच्चाएको नेता सिंहको भनाइ छ । महामन्त्री सिंहले एमसिसीजस्ता परियोजनामार्फत एसपिपी पास गराएर नेपालमा रणनीतिक प्रभाव बढाउने अमेरिकाको प्रयासलाई समयमा नै बुझेर असफल बनाउन सबै राष्ट्रवादी शक्ति एकजुट हुनुपर्ने बताउनु भयो ।

चैत २३ र २४ गते भएका हिंसात्मक घटनाबारे सरकारले गठन गरेको छानबिन आयोगको प्रतिवेदन सार्वजनिक नगरिएकोप्रति उहाँले आपत्ति जनाउनु भयो । आन्दोलनका क्रममा सर्वसाधारणमाथि गोली प्रहार, आगजनी र तोडफोडजस्ता घटनालाई गम्भीर अपराधको संज्ञा दिँदै दोषीमाथि निष्पक्ष र कडा कारबाही गर्नुपर्नेमा जोड दिनुभयो ।

महामनत्री सिंहले नेपालका कम्युनिष्टहरू कम्युनिष्ट जस्ता नभएकाले कम्युनिष्ट आन्दोलन कमजोर बनेको बताउनु भयो । नेकपा (मसाल)ले वर्तमान राजनीतिक अवस्थालाई गम्भीर चुनौतीका रूपमा प्रस्तुत गर्दै राष्ट्रिय स्वाधीनता, पारदर्शिता र जनताको हित अनुसार राजनीति सञ्चालन गर्नुपर्ने आवश्यकता औँल्याएको छ ।

सोही पत्रकार सम्मेलनमा बोल्दै राष्ट्रिय जनमोर्चाका अध्यक्ष चित्रबहादुर केसीले निर्वाचनपछि नेपालको अस्तित्वमाथि प्रश्न चिन्ह खडा भएको बताउनु भयो । अध्यक्ष केसीले संसद, सिहंदरवार, सर्वोच्च अदालत, दलका कार्यालयहरू र अन्य थुप्रै भौतिक संरचना जलाउनेहरूको बोलाबोल बढेको बताउँदै यस्ता गलत काम गर्नेहरूको हातबाट देशलाई जोगाउनु पर्नेमा केसीले जोड दिनु भयो ।

एमसिसी पास गरेर अमेरिकालाई सहयोग गरेका काँगे्रस, एमाले र माओवादीहरूले एसपिपी पास गर्न नमानेकाले अमेरिकाको डिजाइनमा जेनजी आन्दोलन भड्काईएको अध्यक्ष केसीको भनाई थियो ।

चुनावमा जनता झुक्कीएपनि जनताले ठिक बेठिक छुट्टाउने बताउँदै अब बन्ने नयाँ सरकारले देशलाई निकास दिन नसक्ने बताउनु भयो ।

चुनावको हार जितमा आफ्‌नो पार्टीले विश्वास नगर्ने बताउँदे उहाँले भन्नुभयो– ‘हामीले देशको हितमा जनताका मुद्दा उठाउँदै आउका छौँ । अब पनि सङ्घीयता खारेज गर्न र राष्ट्रियताको पक्षमा निरन्तर लागि पर्छौैँ ।’

राष्ट्रिय जनमोर्चाका अध्यक्ष चित्रबहादुर केसीको अध्यक्षता र नेकपा (मसाल)का प्रवक्ता रामप्रकाश पुरीको सञ्चालनमा कार्यक्रम भएको थियो ।