काठमाडौँ । राष्ट्रिय जनमोर्चाका अध्यक्ष तथा समानुपातिक उम्मेदवार चित्रबहादुर केसीले नेपाली कङ्ग्रेस, नेकपा (एमाले) र तत्कालीन माओवादी केन्द्रबाट काम नहुने भएपछि अमेरिकी साम्राज्यवादले घण्टीपार्टीलाई अगाडि सारेको दाबी गर्नुभएको छ ।

२०८२ फागुन ३ गते आइतबार रक्तिम सांस्कृतिक अभियान जापानले तयार पारेको ‘गिलासमा भोट हालौँ’ अडियो गीत विमोचन कार्यक्रममा गीत विमोचनपछि धारणा राख्दै उहाँले सो दाबी गर्नुभएको हो ।

‘कङ्ग्रेस, एमाले, माओवादीले अमेरिकाको पक्षमा गर्नसम्म गरे’ केसीले भन्नुभयो– ‘एमसिसी पास गरेपछि जब एसपिपी पारित गर्न अस्वीकार गर्न खोजे, त्यसपछि अमेरिकाले २०७९ सालतिरै विकल्प खोजेको हो ।’

चीन विरुद्धमा नेपालमा राजनीतिक शक्ति उभ्याउने क्रममा अमेरिकाले रास्वपा (घण्टीपार्टी) लाई अगाडि सारेको उहाँले बताउनुभयो ।

उहाँले भन्नुभयो– ‘अमेरिकाको सहयोगमा रास्वपा खोलियो । पार्टी खोलेको पाँच महिनामै त्यसले २१ सिट ल्यायो ।’

पछिल्लो जेनजी आन्दोलनमार्फत अमेरिकाले दलाई लामालाई नेपालमा पुन:स्थापना गर्न चाहेको धारणा पनि उहाँले व्यक्त गर्नुभयो ।

मन्तव्यको क्रममा उहाँले अमेरिकाले नेपाललाई चीनविरोधी युद्धमैदान बनाउन खोजेकोसमेत बताउनुभयो ।

देशमा यस्तो अवस्थामा आउनका पछाडि सत्तारूढ राजनीतिक दल मात्रै जिम्मेवार नभएर जनताका विभिन्न तप्कासमेत जिम्मेवार रहेको अध्यक्ष केसीले बताउनुभयो ।

फागुन २१ गतेको चुनावमा जनताले देश र जनताको पक्षमा अथक सङ्घर्ष गर्दै आइरहेको राजमोलाई सहयो गर्न अपिल गर्दै उहाँले गिलास चुनाव चिह्नमा मतदान गर्न आमजनतासित अपिल गर्नुभयो ।

अखिल नेपाल प्रगतिशील लेखक सङ्घ (अन्पा) का अध्यक्ष समीर सिंहको अध्यक्षता तथा महासचिव भीष्म जोशीको सञ्चालनमा अघि बढेको उक्त कार्यक्रममा अन्पाकै केन्द्रीय सदस्य ऋतु केसीले स्वागत मन्तव्य राख्नुभएको थियो ।

रक्तिम सांस्कृतिक अभियानका अध्यक्ष गिरीप्रसाद बुढाले सङ्क्षिप्त समीक्षात्मक मन्तव्य राख्नुभएको सो अडियोका सर्जक नवीन बस्याल, स्वर दिनुभएका थुमराज ढुङ्गाना, अन्तर्राष्ट्रिय नेपाली एकता समाजका महासचिव खुम रायमाझी, साहित्यकार मीन राना, मूल प्रवाह अखिल भारत नेपाली एकता समाजका अध्यक्ष प्रेम पौडेल, केन्द्रीय सदस्य खिमराज चालिसेले मन्तव्य राख्नुभएको थियो ।

नवीन बस्यालको शब्द तथा गोविन्द अनेकको सङ्गीत रहेको उक्त अडियोमा स्वर बस्यालसँगै थुमराज ढुङ्गाना र पम्फा बन्जाडेको स्वर रहेको छ ।